早排有傳史提芬史匹堡（StevenSpielberg）監製嘅電影《藝伎回憶錄》俾日本人抵制，原因係不滿搵中國人章子怡做藝伎，章子怡日前接受記者訪問時話𠵱家喺美國拍緊呢套戲，唔係好清楚被抵制嘅事。
章子怡又叫記者同佢澄清，佢並唔係做妓女，而係做日本藝伎，藝伎同茶道、花道及相撲都係日本嘅傳統文化，佢𠵱家學緊藝伎嘅舞蹈，每日要練好多個鐘。
事業一帆風順嘅章子怡又承認全靠張藝謀同李安兩個貴人，而生命中第三個貴人就係史提芬史匹堡，佢話當初史匹堡搵咗好多有實力嘅女星面試，最後自己幸運獲選，又話對方畀咗好多鼓勵同信心佢。
章子怡話第一次拍荷李活電影，全程要講日本口音嘅英文，佢之前好擔心英文唔掂，𠵱家已經進步咗好多，重話自己已經可以喺片場同啲美國演員講笑喎，以佢咁熱情嘅性格，唔知會唔會又同美國演員傳緋聞呢？
焦媛今年五月做完音樂劇《印象．蘇絲黃》後，年尾同元旦檔期會捲土重來，再次公演六場，今次除咗有新布景同新舞蹈之外，扮性感吧女嘅焦媛亦會着上多套新旗袍上陣，而佢同曾江重會有唔少親熱場面㖭，馮仁昭就拭目以待啦！
啱啱喺內地登台返港嘅關寶慧前晚接受新城訪問，登台期間好多人認錯佢係劉雅麗，關寶慧話：「初頭都冇所謂，但𠵱家已經去到厭煩嘅地步。」原來唔止內地人認錯，更離譜係劉雅麗個老竇都認錯關寶慧係自己個女，關寶慧話：「一次我去劉雅麗屋企，佢老竇一入嚟見我背面就鬧我衰女，我擰轉面叫佢世伯，幾尷尬。」
林曉峰近排經常巡迴港九各地酒吧做棟篤笑賺奶粉錢，早前做完十場，𠵱家又做五場，前晚佢喺尖沙嘴做第二場騷，佢話會一路搵場地做落去。林曉峰話：「細仔就嚟滿月，但大仔好呷醋，成日一個人呆坐，我見到佢，個心好唔舒服，連出街都唔捨得。」
張學友日前喺內地為音樂劇《雪狼湖》主持開工儀式，呢套劇喺十二月二十四日起開三場，再喺下年一月一日開多一場，有位內地男fans為支持學友，成功做咗第一個打電話訂飛嘅觀眾，主辦單位重安排佢同學友見面，令fans感動到想喊！
葉文輝（啤梨）主持嘅電台節目《卡拉O！Babe》喺銅鑼灣搞咗個《新城慈善唱K大晒馬拉松》活動，連續唱K八十個鐘，啤梨前緋聞女友嘉碧儀都有去撐場，重帶咗大堆護膚品畀啤梨用。問嘉碧儀驚唔驚同啤梨嘅緋聞死灰復燃？佢好老定咁話：「唔驚，因為傳嚟傳去都係嗰啲，聽慣唔使理。」
