爆機狂迷：
《怪誕城之夜》三大變身多怪招

提起萬聖節，好多人必定想起各種古怪慶祝活動，不過今年有個新玩法，就係打機，事關CAPCOM又有一款大作推出——《怪誕城之夜》，遊戲內無論畫面到人物設定都相當有萬聖節特色，新奇趣怪，喺屋企打機都可感受趣怪氣氛。

記者：許福合

遊戲類型：動作
對應機種：PS2
遊玩人數：1人
行貨售價：$398
開發商：CAPCOM
(c)2004TouchstonePictures
DevelopedbyCapcom

遊戲同早前《怪誕城之夜》電影內容有些關連，一開始大家要做心理準備，OpeningCG特別長，差唔多睇咗5分鐘，交代好故事背景，而製作相當認真出色，就好似睇緊卡通動畫一樣。劇情係接續電影版之後，敍述Jack外出冒險時，Oogie趁機作亂，使得萬聖節鎮居民不得安寧，Jack回來之後，為讓萬聖節鎮居民安居，及救自己嘅愛人，於是起而對抗Oogie等亂黨。遊戲玩法基本上包括有戰鬥同解謎部份，平常喺鎮上走走，就會見到唔少古古怪怪嘅人，同他們說話就可以接獲任務。

新奇武器玩法多
睇阿Jack咁嘅身形，估都估到唔會有好大破壞力，所以要搵一樣啱身武器傍身，答案就係由一個古怪博士找出解決辦法，替阿Jack找來綠色嘅怪生物，會纏喺Jack手上，個名叫「SoulRubber」。顧名思義，即係有晒液體同膠質嘅物性，可長可短，又可變形，利用SoulRubber攻擊敵人可以有唔同打法，遠近皆宜，而且可以配合成連續技，打起來只覺得非常爽！若果熟習起來，能夠配合走位移動就更好，最理想係先來個遠攻，再接上一系列連續攻擊，打起來會特別輕鬆，玩家還可以利用SoulRubber嘅黏性，將敵人拉過來打。必殺技嘅出招方式亦好獨特，會一邊唱歌跳舞攻擊，玩家要做嘅係按照指示按鍵，相當過癮。而SoulRubber唔單止係用嚟攻擊，當去到危險或無路可行之處，就可以靠SoulRubber盪過去。

變身多技能
若果只得SoulRubber打足全場，實在好單調，所以加入三大變身玩法，如變身為火燄南瓜Jack與聖誕老人Jack等，變身後各自擁有唔同技能，變成火燄南瓜可以有強力嘅噴火攻擊，破壞力一流，不過缺點係速度慢。而聖誕老人嘅攻擊就最過癮，會走到敵人前將麻痹彈、冰凍彈當禮物一樣送給敵人，其他還包括多個變身系統，每個系統都會有各自技能，需要玩家按情況配合使出。新作在畫面以至技能方面，都相當一流，音樂又特別有Feel，好有電影感。但遊戲流程有點慢，唔夠爽，加上解謎元素，未必適合純追求動作快感嘅機迷。