港人喺悲情城市九份遇上大車禍，董建華政府今勻反應極快，老董召集新任衞福局局長周一嶽同政制事務局局長林瑞麟開會後，前前後後派咗兩個顧問醫生、一個急症室醫生、兩個護士、四個入境事務處人員飛去台灣幫手，協助遇事港人返港同就醫。
但係好多人都疑惑，向來反應慢幾拍嘅老董，點解今次咁快就拍板派人救援呢？有醫管局醫生同八方吹水，指若然今次大車禍喺大陸出事，老董肯定唔會、亦唔敢派人上大陸。事實上以往港人喺內地遇上意外，香港政府絕少會派人去善後。
又舉個例，舊年沙士爆發，小強同陳馮富珍連電話都唔敢打畀京官攞料，容乜易畀人篤背脊，話唔信任祖國專家，甚至刺探國家機密。
今次喺阿扁地頭出事，老董當然冇有怕，表面上派人去援助同胞，其實可能係暗寸阿扁嘅人醫療水準唔掂，以人道理由去救援，香港官員就大條道理直踩九份，重有象徵阿扁畀老董踩到埋身嘅意味。老董今次曲線打扁，可以話係幫北京領導人出番啖氣，不過八方心諗，老董呢啲都只係小動作嚟啫，人哋台灣同胞一句「我們有公投」，香港人就即刻冇聲出啦！
傳真︰2623-9278
電郵︰