遠足，常見蝴蝶或蜻蜓眼前掠過，恨不得用相機把牠們的美態捕捉下來，可恨攝影技術仍停留幼稚園階段，要拍攝活生生的昆蟲談何容易？以下推介一生態攝影課程，既可學懂拍攝技巧，又可透過鏡頭認識大自然，你，可有興趣？
記者：尹珊珊
攝影：黃子偉（部份圖片由程詩灝及綠色力量提供）
平日拍攝靜態物件也會手震兼鬆郁朦，要拍攝識飛的蝴蝶、蜻蜓無疑是向高難度挑戰。為免失禮街坊，急Call教授生態攝影的Charles惡補。他說：「過幾日會同班中文大學學生去深涌上實習課，有興趣就跟嚟啦！」好，一於帶部儍瓜機照跟。至約定日，隨大隊乘快艇往西貢深涌，甫到達碼頭，Charles遙指對面山頭道：「大家留意，嗰邊樹林有白腹海鵰巢穴，𠵱家香港得番大約8至11對，影唔影到睇彩數嘞！」
稍待片刻，對面山頭未見動靜，Charles着學員拿出相機，到碼頭附近的樹叢嘗試拍攝蝴蝶：「影蝴蝶要用微距拍攝，像素要調校至最高，大家暫時用住P掣先，因為P掣有曝光補償，對拍攝蝴蝶有幫助。」「Sir，咁使唔使用閃光燈呀？」「無必要都唔好用，因為好容易會嚇走蝴蝶，影嗰陣要保持安靜，唔好咁大動作。」說罷一聲號令，眾人隨即四處找尋獵物，見同學仔個個專心又認真，身為插班生的我亦不敢怠慢，有理無理，見蝴蝶即影。「呢隻係酢漿灰蝶，嗰邊那隻係黃襟蛺蝶。」雖然同學們早前上了理論堂，但始終對蝴蝶品種認識不深。惟有靠Charles從旁講解。
首輪拍攝收穫不多。我們轉移陣地，在河堤附近繼續拍攝。Charles細聲提點：「有好多亮灰蝶，淨係呢幾棵樹已經有成六七隻。」影昆蟲講耐性，很多時人未走近，蝴蝶已飛得無影無蹤。攝影師便因為衝口而出的一句：「我最憎影蝴蝶！」即惹來旁邊女同學白眼：「無耐性！」只見同學仔為求拍張好相，個個傾盡耐心，又踎又跪，幸好深涌是蝴蝶孕育地，品種數目奇多，點都無走雞，何況還有Charles教路：「蝴蝶最鍾意喺馬櫻丹上面吸蜜，在樹蔭、溪邊、腐爛果實、動物糞便等，都好容易會搵到。」
生態攝影與其他題材有別，空有技巧沒有用，Charles謂：「要因為鍾意生態而攝影，而唔係鍾意攝影而影生態。」所以參加者最好事前做足功課，對生物的特性有基本了解，「影到生物外表唔代表生態攝影，真正生態攝影係要捕捉動物行為。例如進食、交配。」在Charles指導下，我們在一幅棄耕農地上拍到蜻蜓點水的美態，令圖片看起來更覺生動傳神。
阿傑（左）：「平時唔會專登走去郊外影相，𠵱家有成班人陪，又學到嘢，梗係好。」
小吉（右）：「我本身讀生物系，上過幾次理論同實習堂，覺得好實用，以後做功課都方便啲。」
同屬天文學會的（左起）Claudia、Eddie及萊口徑一致：「我哋都係因為鍾意生態而攝影，所以好期待下次嘅實習堂。」
生態攝影課程資料
主辦：生態教育及資源中心
日期：第一班：理論課（10月26日、11月2日、11月9日）
實習課（10月31日、11月14日、11月21日）
第二班：理論課（11月15日、11月22日、11月29日）
實習課（11月21日、11月28日、12月5日）
內容： 理論課共3節，每節2小時，教授數碼攝影基礎、拍攝動植物之技巧及作品後期製作；實習課共3節，每節6小時，分別於室外以微距拍攝小昆蟲、以長距拍攝雀鳥及用廣角鏡表達大自然之美。
課程人數：15人
費用：$380（實習課之交通費須自付）
查詢：26972029