長假之前，恒指埋單升16點，最低之時亦不過跌54點。睇指數，個市好似和風細雨，冇乜殺傷力，實情係好多槓桿率高嘅C輪，都跌得幾厲害，又或者正股冇事，啲輪價則仍然下跌。
聯想C輪：聯想（992）喺恒指成份股中，跑第一，收2.70元，升3.8%。結果兩隻X輪9957與9393，小量成交下，分別彈升30%與26%。既然係X輪，一般散戶都唔識計啲數據，冇乜人得益。標準C輪2107，收68仙，升15%，明年2月到期，溢價2.2%，槓桿率4倍（有效3.4倍），引伸波幅52%。若果睇好正股，2107勉強係適當對象，但交投唔多，買賣唔貼價，唔多啱炒。正股上落難測，算數，聯想C輪無謂諗。
華創C輪：華創（291）收10.65元，有15仙進帳，帶起隻C輪2201，收19仙，升幅11%。隻輪06年3月到期，大把時間，溢價10.6%，槓桿率5.6倍（有效3.7倍），引伸波幅32.3%。隻輪數據算係咁，不過太遠期嘅輪，輪價變化未必跟貼正股，交投麻麻。若然睇好華創，直接買正股好過。
信置C輪：信置（083）復牌，發行CB（可換股債券），反應雖好，但股價反應則唔好，收6.50元，跌9.1%，𠵱家大概可以明白，政府高價賣地後一般地產股唔對辦，信置點解會咁硬淨。信置唯一嘅C輪9322，散24%。隻輪下月24日最後買賣，負溢價2.3%，槓桿率3.3倍（有效亦係），引伸波幅冇意思。正股有排牛皮，隻輪成交又少，諗唔過。
章盛