由於棉價今年持續回落，所以早兩個月有多間外資大行推介紡織股，但激情過後，最近呢類紡織股紛紛由高位回落，有人懷疑係芬佬賺夠散貨，亦有人估計係因為紡織股的盈利未如想像中咁好，有人偷步沽貨先所致。
例如魏橋紡織（2698）股價最近由13元樓上，跌至12元樓下；至於德永佳集團（321）亦由7元樓上跌落嚟，噚日再跌2.24％，收6.55元，成交股數253萬股，金額1643萬元。
經紀黃話覺得奇怪，因為紡織股雖然唔係當炒股，但喺冇乜壞消息嘅情況下，加上𠵱家棉價比起舊年高峯期已回落約3成，實在唔明點解紡織股會跌成咁？
佢又話，德永佳截至今年3月全年業績盈利倒退，主要原因係棉價上升，呢個問題解決後，斷估今年上半年盈利有改善，而且旗下喺中港台的零售業務，照計亦有進步，所以橫睇豎睇，都覺得德永佳的股價跌得相當唔合理。
慕容小初