曾經患抑鬱症嘅林建明（大姐明）同曾智華，會一齊主持逢星期六朝早九點至十點播出嘅港台新節目《各領風騷》，佢哋會邀請嘉賓藝人暢談人生中最重要嘅一課。近排幫大姐明做咗錄音訪問嘅有鄭裕玲（嘟嘟）、何守信、黃百鳴同董驃，嚟緊周潤發、張學友、劉德華同劉嘉玲都會接受訪問。
大姐明同曾智華噚日喺尖沙嘴會見傳媒，大姐明話聽日打頭陣嘅嘉賓係嘟嘟。嘟嘟喺訪問中話已經諗定死亡，重立晒遺囑。曾智華又問嘟嘟已經四十七歲，總會有皺紋，問佢點keep啲皮膚？嘟嘟話：「前幾年出鏡時已經覺得自己塊面啲肉墮墮哋，所以就去做健身同跑馬拉松，𠵱家就成個筋肉人咁嘞。」馮仁昭重知道嘟嘟會話呂方對佢嘅人生影響好大，兼唔會令嘟嘟唔開心㖭！
至於何守信，佢當年先後同歐嘉慧同汪明荃拍過拖，但都冇結果，何B對此就承認自己感情拖泥帶水。
而董驃就自爆有四個女人冇同佢結過婚，但都幫佢生仔。𠵱家董驃最大個孫有二十幾歲，但最細個仔就得十幾歲，所以佢好羨慕何鴻燊同四個阿太分配得咁好。
鄭伊健早排同林曉峰一齊去上海宣傳資生堂男士護膚品，伊健重好有機會唱埋廣告主題曲㖭，而呢首歌嘅監製陳光榮亦有出席活動。伊健同林曉峰兩個鬼鬼馬馬咁話要組番隊樂隊，搵埋林嘉欣同梁詠琪，擺到明攞林嘉欣同陳光榮嘅戀情開玩笑啫！
亞姐冠軍人馬陳煒噚日以小組評判團成員身份同今屆十八位候選亞姐見面，煒哥以一身低胸性感晚裝加上身上廿幾萬嘅首飾，輕易成為全場焦點。煒哥重話一早做好措施防走光，佢話：「我黐咗膠紙，但係覺得甩甩哋，之後再加咗個隱形胸圍㖭。」
許志安同葉德嫻噚日接受商台訪問，提到譚詠麟早排封許志安、李克勤、古巨基同梁漢文做新一代四大天王，安仔話：「唔好呀？我好怕呢啲稱號，我只係一個小歌手，唔使做天王啦，一係叫『新金枝慾孽』嘞。」不過馮仁昭覺得封號對歌手嚟講都係一種讚賞，應該開心至係！
梁朝偉日前喺意大利接受有線娛樂新聞台主播陳貝兒訪問，訪問會喺今晚出街。偉仔澄清早排喺釜山電影節講嘅係「泡茶嘅愛情觀」，而唔係「泡菜」，佢話茶嘅味道會由濃變淡，直至最後冇晒味；偉仔另外又用鞋去形容愛情，話度身訂做嘅皮鞋適應腳形，就好似兩個人走埋一齊要互相忍讓咁！
組合Boy'Z噚日喺銅鑼灣出席活動時，成員Kenny話好恨拍拖，問佢有冇暗戀對象，Kenny就自爆對一個女仔有好感。但Kenny對於意中人嘅資料就三緘其口，喺馮仁昭追問下，佢就話對方唔止識得唱歌同跳舞，重會講多國語言㖭！聽佢咁講，薛凱琪同董敏莉嘅嫌疑最大，但Kenny即時詐儍扮懵話唔記得喎！
