李克勤邀請超模冠軍Melanie拍攝新歌MV，當兩人被威吔吊高拍攝相擁鏡頭時，身穿吊帶裙的女主角露出酥胸，克勤事後表示無暇欣賞女主角身材，因吊威吔令他下半身很辛苦。
李克勤前晚在西貢拍攝新歌《空中飛人》MV，邀請了早前在超級模特兒大賽中奪得冠軍的Melanie擔任女主角。兩人須吊威吔升至十呎高空，Melanie攬實克勤，克勤則以單手扶着威吔架，另一隻手則抱着女主角，其間身穿吊帶裙的Melanie做出俯身動作，露出酥胸，工作人員見狀即將她降回地面，並替她黐膠紙防走光，然後才繼續拍攝。
事後問克勤有否看見Melanie走光，他說：「我邊有時間睇到呀？乜鬼都睇唔到，佢頭髮都遮住啦，我單臂扶住喎，我隻手唔辛苦，只係腰最辛苦，下半身辛苦啲囉。不過我都吊慣，拍《六壯士》時幾十樓咁吊，呢啲濕濕碎啦。」
克勤又大讚唱片公司在市道低迷下，仍願意斥資三十萬元給他拍MV，他自言：「以前拍個MV閒閒哋一百萬，𠵱家唔得㗎，三十萬已經好有誠意。」
克勤表示最難是覓女主角，他說：「肯吊威吔又冇畏高，平時搵親女主角話要吊威吔，都覆話冇期，難得佢又肯。」
克勤前晚的一身服飾是由女友盧淑儀負責揀選，而*「7」字頸鏈則是其幸運號碼。
提到香港旅客遊台灣九份時遇嚴重車禍，克勤表示到台灣工作時，當地司機均十分注重安全，而到內地則會用回自己的司機，所以十分放心。反而克勤曾與陳百祥從法國到荷蘭觀看球賽，回程時司機竟飛車以三小時返抵法國，令他十分害怕。
採訪：馮美茵
攝影：何國豪
