風魔全球的《哈利波特》作者羅林（J.KRowling）話喺佢寫緊嘅第六集《哈利波特與混血王子》中，有一個好重要嘅角色將會死。喺乜都賭得一餐嘅英國，近日忽然有唔少人都落重注買哈仔嘅亞裔女友張秋會死，博彩公司更將張秋嘅賠率火速下調。
張秋一角將會喺《哈利波特》第四集《火盃的考驗》中出現，而電影版嘅角色就鐵定由一名由香港移民英國、現年十六歲嘅KatieLeung主演，而現時由丹尼爾拉德克利夫（DanielRadcliffe）所飾演嘅哈利波特，重會向張秋獻上初吻。
前日博彩公司BlueSquare嘅發言人話，近日突然有大批注碼押喺張秋身上，唔少人落咗賭額上限嘅一百鎊（約一千四百港元），博彩公司認為呢種情況好罕見，懷疑有人知道故事情節。發言人重話：「有人喺半夜三更開戶口，佢哋係第一次落注，就買重張秋會死，令人覺得佢哋好似知道某啲內幕，我哋惟有將賠率由一賠八下調到一賠三。」
不過羅林嘅發言人話，張秋會死呢個講法純粹係fans嘅忖測。至於啲賭徒收唔收到錢，就要等下年夏天《哈利波特與混血王子》發行嗰陣先知。