正當中國隊為出線世界盃外圍賽首輪分組賽而煩惱之際，鄰國日本就肯定獲出線權情況下，輕鬆得多，一於搞搞新意思，想徵召幾位「元老」球員幫手。
日本足協同教練薛高構思徵召現時仍有在職業聯賽上陣嘅昔日國腳，好似山口素弘、城彰二、三浦知良同中山雅史等，加埋缺席國家隊多時嘅中田英壽、稻本潤一等星級球員，應付下月喺埼玉主場對新加坡嘅最後一場世盃外圍賽首輪分組賽；因為勝負對出線大局無關痛癢，加上薛高臨場繙譯員又要停賽，實行當正一場表演場咁搞。
不過，構思已經有人反對，認為唔尊重對手。我求大俠認為，如果班「元老」兩、三個一組輪流上陣，問題應該不大，話晒都重踢緊職業聯賽，狀態唔成問題，可行。
前晚歐冠盃國米作客將華倫打到落花流水，贏到五個一皮，主隊意籍領隊雲尼亞里一心以夷制夷失敗，最慘情前日啱啱係佢五十三歲牛一，輸到咁大鑊，難怪佢賽後承認過咗最「難忘」嘅生日。講時講，佢賽後冇話賴呢樣賴嗰樣，而猛咁恭喜同讚對手贏得清脆，總算輸波冇輸品。
拉素減薪潮一浪接一浪，繼前鋒S恩沙基同埋後衞尼古路後，會方打算向中場老將甸奴巴治奧開刀，會長盧迪圖親自開聲要「甸奴」減薪。又係嘅，「甸奴」已過晒氣，今年已經三張三，而今季一場波都未踢過重𢭃緊三萬幾鎊周薪，點講都唔着。怕且佢都難逃「瘦身」。
國足為咗下個月同香港嘅世盃外圍賽又有新計劃，因為較早前經已預計咗會喺對香港之後兩日，主場同意大利踢場友賽，但有消息指中國足協希望取消呢場比賽，皆因如果中國隊唔可以出線，重邊有心機踢友賽。意國足總為咗呢場友賽，連意甲賽程都改埋，如果最終取消，就真係可惜。
「車仔」鐵衞泰利喺前晚歐冠盃又再爆出成為首名入球者，已喺三場歐冠盃賽事全部有入球，計埋呢場更係兩度成為廿幾倍「首球」球員。不過領隊摩連奴就話就算前線唔夠人用，都唔會用佢改打前鋒，反而侯夫就有機會試吓箭頭位！建議大家下次兩個買晒，咁好分頭抵玩吖。