踢足球嘅陣式，二十世紀五十年代末之前，盛行WM式，兩名後衞、三名中場、五名前鋒，顯而易見，陣式以進攻為主，唔打守勢足球。到咗一九五八年，巴西奪得世界盃冠軍，採用四二四陣式，十七歲小子比利一舉成名，巴西森巴足球震驚世界。之後又有國家打四三三，到咗八十年代，全世界都以四四二為主流，全面加強防守，對左右中場嘅要求極高。
踢波可以經常改變陣式，總之視乎手上球員嘅能力、質素，教練用乜方法都得，打四五一又何妨。教育制度方面，就唔好搞咁多嘞，行錯一次，撥亂反正要成二十年。好似香港咁，一九八八年政府強迫中文大學由四年改為三年（四改三），唔准港大三改四，唯一嘅目的就係要慳錢，因為港英增加大學數目吖嘛。
現在特區政府希望將大學學制改番做四年，為咗配合，中學改為六年（三年初中、三年高中），與中國美國加拿大日本南韓台灣嘅三三四學制接軌，脫離英國佬推行嘅五二三（五年中學、二年預科、三年大學）。呢樣嘢，左丁山舉腳贊成，肯定支持！一九八八年因學制之爭，所有四改三、三改四；五二三、三三四嘅正反兩面，都已經傾過晒，現在如果有人反對，相信甚麼理論理據，都走唔出一九八八年大辯論嘅範圍，大家有時間，翻查當年嘅報紙就知得好清楚。今次唯一不同嘅，就係同時間中學課程修改，設四科必修（中英數加通識教育），在技術問題上，反對派或者借題發揮，設置路障。
三三四制要到二○○八年先至開始推行（如果立法會通過嘅話），距一九八八年剛好二十年，當年有份喺立法會門外靜坐示威嘅中文大學生校友，等咗二十年先至有機會「平反」，呢次最緊要出聲支持三三四呀！