羅氏地產家族成員羅家寶，日前話睇中區甲級寫字樓價出年最少有兩三成升幅，噚日市傳佢一擲五億向澳洲基金LendLease買入皇后大道中九號四層，呎價九千。不過，羅家寶有關人士話佢哋冇買到，至於係咪洽購緊就唔評論。
代理話，LendLease重整投資組合，決定將九六至九七年間分段購入嘅皇九四層，一次過出售，目標呎價一萬以上，出售意欲極高，經紀當然出力搵客，除羅家寶外，唔少投資者亦有出價洽購，每呎徘徊九千蚊水平。
LendLease持有皇九嘅四、十八、二十和三十二樓，每層大約萬三呎，購入價每呎六千五至九千，現市價出貨唔使蝕，但買家梗係想執平貨啦。
反映二手樓市嘅中原城市領先指數，喺截至十月十七日一周，報四十七點零八點，比之前一周僅升零點零六點，係連續第三周上升，但幅度就收窄咗。呢個數字係今年第四高，中原黃良昇估計，指數好快會升穿今年嘅高位，四十七點三二。
睇番啲成份屋苑造價，三十八個呎價錄得升幅嘅屋苑，再唔見有一個月升逾一成嘅場面，最高嘅天水圍嘉湖山莊，都係升得八點二個巴仙，呎價見一千六百九十三蚊。
而火炭駿景園就升近八巴仙，呎價逾五千，報五千一百六十五蚊。
嚟自新加坡嘅過江龍信和集團，除咗拓展本港業務外，喺祖家嘅發展都冇放慢，其中最為人熟悉應該係新加坡浮爾頓酒店，呢個由歷史建築物改建而成嘅酒店，重幫佢哋攞咗唔少獎㖭。
國際旅遊雜誌CondeNastTraveler，最近選咗浮爾頓為亞洲十大最佳酒店第三位，僅次於曼谷半島同香港半島。
浮爾頓酒店自○一年開業以嚟，總共攞咗八個獎項。
分層寫字樓忽然當旺，唔少早年高價入市嘅蟹民，都及時壯士斷臂，就如亞洲電視前行政總裁封小平及有關人士，據悉剛以六千八萬售出金鐘海富中心二期十三樓。
有謂十三不祥，封總九七年樓市高峯期，以億一買入呢層一萬呎有多嘅寫字樓，呎價過萬，冇耐樓市就一蹶不振，最低潮時跌至每呎三千幾，今次趁個市勁彈一倍，就以近六折，每呎六千四蚊沽貨離場。
唔少業主因為油價係咁升而唔買車，利嘉閣報告指出，第三季車位買賣登記只得一一二二宗，係○三年第一季以嚟最少。
不過，部份屋苑車位價竟然逆市上升，好似紅磡海逸豪園，第三季雖然得二十六宗登記，但平均每個車位賣五十九萬六，比第二季升七巴仙，係二十一個受調查屋苑中最高。第二位估唔到原來係機鐵上蓋嘅青衣盈翠半島，要近五十九萬一個。
鰂魚涌康怡花園車位，相信係港島屋苑中最抵買，每個平均二十七萬，柴灣杏花邨、西灣河鯉景灣，要四十萬以上至有交易。
噚日深圳又有地皮拍賣，係龍崗區布吉鎮阪雪崗工業區地塊G03404-0008號，雖然只得三家發展商投競，但爭得幾激烈，經過二十七次承價先賣得出，成交價二億三千四百萬（人民幣，下同），比業界預期高少少。
幅地七十六萬六千呎，可建總樓面九十九萬六千呎，開價一億八，最後由深圳市萬科房地產有限公司投得。每方呎樓面地價二百三十五蚊。置業國際董事總經理姜樹榮表示，地皮適合起住宅，估計落成後可賣達五百六十蚊呎。睇番資料，萬科舊年都用九億七投到同區另一幅商住用地。
電郵地址：
