十月九日本欄講「留學澳洲工科中招」，講讀者梁先生送個仔去澳洲大學讀工科，點知因為梁公子並非澳洲永久居民，當地公司唔請佢做實習，搞到冇法子攞學位。
兩位讀者來電郵，要求澄清，以免其他學生產生誤會。因為香港有好多年輕學子留學澳洲，呢類資訊好有用，不妨講清楚。
讀者GY話，澳洲大學嘅工科課程各有不同要求，不可一概而論。（一）學生可以在香港實習，學校承認就可以得學分，詳情要向大學查詢；（二）好多學生唔會透過學校搵實習，而係自己去拍門，用電郵、電話周圍查問，海外學生可以每星期做二十小時，暑假期間（十一月至二月）可以做更長時間，自己到移民局申請工作證；（三）申領到工作證就可以全職工作，上移民局網站
讀者Holly話海外學生可以自己去搵實習，最緊要識轉彎喎。其他遇到類似問題嘅澳洲工科生請多啲搵學校了解詳情，另方面自己去挖掘機會。
上次來電郵講中國MBA嘅讀者M再度來電郵，講述內地MBA學生勇於發言，勇於發問，但係分析力較差，太注重記憶。讀者M不忘講一句：「本人母親讀到你所寫嘅專欄內容，特別要我同你講，她其實還很年輕的。」真好，年輕阿媽好着數，個仔讀完MBA獨立做事嘅時候，重係年輕喎，肯定身心愉快，精神飽滿，可以無牽無掛，尋找第三春（第一春係拍拖結婚，第二春係睇住乖仔讀完書，第三春就係與老公恢復二人世界，安享黃金歲月）。一位老友計過，佢位公子讀完MBA，自己已入古稀之年，好驚到時已經冇咗精力。讀者M有位年輕媽咪，媽咪夠晒幸福！