區區有睇頭，區區有窮人，只有深水埗給零零舍舍highlight出來，被冠以「全港最窮」代號，在貧窮榜中領先觀塘和元朗。
其實只是相差零點幾個百份點，時也命也，深水埗成為窮中之極，比起銅鑼灣的全港至潮、旺角的全港至yeah、飛鵝山的全港至野和九龍塘的全港至愛（loveandsex），深水埗有自己的「最」，形象鮮明，窮得不掩飾，窮得高透明度，窮到墊全香港底，窮得有義氣。
我醜，但我很溫柔。我窮，但我很自在。家在全港最窮的深水埗，自我感覺跟住在國金二期頂樓差不多。窮也一樣可以high，你不相信，是因為你未去到全港最窮的地步。人窮志短，某程度上是真的，尤其是你要跟李嘉誠鬥，短那個，不必用cm量度，肯定是你。中環有洪金寶，深水埗沒有李嘉誠，只有儍瓜才會跨區去深灣跟誠哥比。
深水埗有了「全港最窮」封號，就像拿了一張文憑，通過了測試，證實窮得合格，從此靠最窮行走江湖。躝癱向你度水，你表明是深水埗街坊，迫對方面懵懵知難而退。窮到最，賊佬也會過主去第二度搵食，區內特太平。深水埗不同黃大仙，發窮惡情有可原。深水埗一窮驚人，政治人物流行做還政於民騷，田少，你能不去深水埗嗎？肥彭錯過深水埗，董班子不能步他後塵，董太千祈要去李鄭屋邨示範洗手。梁振英想做下屆特首？先試吓一家大細在50呎板間房度周末的真人騷。