過氣流行天王米高積遜（MichaelJackson）俾加州法院控告佢十項侵犯兒童罪，呢單官司煩咗佢好耐，雖然件案喺下年一月先正式開審，但係米高對單案非常憂心，佢屋企人都怕米高會一時睇唔開，所以頻頻開家庭會議，防止米高做儍事。
米高同兄弟姊妹嘅感情一向唔錯，今次成家人都有切膚之痛。阿哥JermaineJackson重話：「米高唔會坐監，佢喺被判入獄之前，一定會自殺死！」由於積遜家上下都覺得米高近排心情好差，所以成日開會諗計仔，睇吓點樣可以幫到佢，以免佢傷害自己。
不過佢家姐LaToya對米高就差啲，話說米高當年憑一套獨特嘅舞步Moonwalk打響名堂，但LaToya最近喺英國電視台度玩踢爆，話Moonwalk根本唔係米高原創，佢重話米高只不過從電視節目裏面一個dancer抄返嚟。
雖然米高單案令積遜家個個都好煩，不過珍納積遜（JanetJackson）前日仍然有閒情同監製男友JermaineDupri齊齊去洛杉磯，出席講述已故失明音樂人RayCharles嘅電影《Ray》嘅首映。當日洛杉磯氣溫有成十七、八度，但珍納竟然着住件好厚嘅mink出現，雖然吸引到攝影師嘅注目，但會唔會生熱痱呢？
另外，近排俾米高炮轟嘅Eminem，佢好尊敬嘅阿叔前晚吞槍自殺身亡。