周潤發差唔多休息咗兩年冇拍戲，日日四處去影相，不知幾開心，不過呢種咁舒服嘅日子就嚟結束啦！
因為呢兩年佢係咁推戲，美國經理人公司都出聲要佢拍番戲，所以出年佢可能要一口氣拍番三部戲，聽講發哥明年二、三月就會接拍一部英國片《Wretched》，部戲會去西班牙同倫敦取景，故事係講一個中年人與一個年輕人嘅情義。
另一部係美國片《DeadlyDeception》，呢部係動作加懸疑嘅題材，兩部西片會喺八月之前完成，到年尾發哥就要參演吳宇森套《赤壁之戰》，雖然外間一直盛傳佢辭拍呢部戲，但據馮仁昭所知，佢同吳宇森已開始討論劇本同造型問題，所以呢部戲佢係應該會接拍嘅，發哥歎咗兩年咁耐，出年拍番三部戲補數都應該啦！
梁漢文噚日接受港台訪問，講到上年獲得唔少獎嘅梁漢文今年落後咗，佢就話原本新碟喺八月推出，但因為今次會親自奏音樂，所以要延遲到十月先出，佢又話：「可能我後勁凌厲呢！」自稱湊仔有一手嘅「梁炳」，噚日就被主持人車淑梅考起，要佢即場為BB公仔包尿片，梁炳表現得雞手鴨腳，重將尿片掉轉㖭。
內地演員王伯昭遭假戲真打事件，已經擾攘咗成個月，噚日有內地報道話王伯昭嘅律師吳昊決定喺一周之後，以民事訴訟嘅形式控告張衞健同謝霆鋒，索償約一百萬人民幣，不過霆鋒經理人霍汶希就話啲消息日日都唔同，總之到噚日為止，有關方面都重未搵過佢哋。
王菲已經四年多冇喺台灣開演唱會，但佢下個月底會喺嗰邊開一場個唱，而同月喺台灣開演唱會嘅重會有蔡依林同周杰倫㖭，認真熱鬧。王菲演唱會籌辦商表示，目前已經賣出咗大約一萬五千張飛，最貴嘅飛賣約七百多元。而蔡依林就賣咗成一萬兩千張飛，最貴嘅飛約三百元。
陳柏霖近日將出發去內地拍攝新戲《情天大聖》，戲中佢會扮演孫悟空，而謝霆鋒就會扮唐三藏，陳柏霖噚日喺台灣扮馬騮，佢又大呻現實生活裏拍拖同處理感情問題好辛苦。陳柏霖重自爆話連經理人都曾經向佢請教解決感情問題嘅方法，馮仁昭都估唔到陳柏霖原來係戀愛專家！
