港股前日個勢本來靚靚哋，奈何隔晚美股唔生性，結果港股昨日跌突，恒指收12999，算係跌破萬三點。國指跌幅更大，冇咗2.4%。
中企C輪：國指上周最低4515，昨收4504，輕微跌破，下一次可能下試上月尾低位4476，若果如此，而又唔跌破，則細細注博中企指數C輪。
中企指數C輪對象有兩件，2139同2114。2139年底到期，輪價14仙，溢價3.8%，槓桿率11.9倍（有效7.6倍），引伸波幅34.6%。2114亦係年底夠鐘，輪價10.8仙，溢價4.9%，槓桿率13.9倍（有效8.1倍），引伸波幅34.8%。個市飄忽不定，有心理準備啲輪價波幅好大，例如昨日，國指唔見2.4%，2139同2116跌幅放大8倍，雙雙唔見兩成。
新地C輪：地產股昨日冇氣，同信置（083）與尖置（247）停牌有一定關係。兩公司傳涉發行可換股債券，若然係咁，唔係做披成，而復牌後冇乜大走樣，則近期已下跌嘅地產股如新地（016），會有機會反彈。
低位，吼些少新地C輪，熱門短炒對象係2252，明年2月到期，輪價32仙，溢價6.9%，槓桿率22.6倍（有效9.9倍），引伸波幅26.3%。講數據，2151則相當靚，明年1月到期，輪價54仙，溢價3%，槓桿率13.4倍（有效8.3倍），引伸波幅27.6%。
長實C輪：政府賣地之後，長實（001）最高68.25元，昨日64.50元，高位回落3.75元，唔使太悲觀。吼低位執C輪2249博反彈，明年2月到期，輪價38仙，溢價6.7%，槓桿率17倍（有效8.8倍），引伸波幅26.7%。
章盛