好多人買DC時都有個錯覺，後繼機=Upgrade！買機當然係寧新莫舊啦。不過筆者就感覺相反，近兩年好多DC廠商真係出機濫咗，鮮見有求新求精嘅精神，反而一味玩市場策略，呢度加少少，嗰邊減少少，咁就話掟部新機出嚟等大家爭！
呢期最紅嘅例子，當然係剛落場賣到周圍斷晒貨嘅「水版」IXY50啦（香港行貨版未出）！好多Sales都打正旗號，話佢係IXUS430嘅後繼機；以「小鐵盒」一直留存人見人愛嘅威名，加上機身又話有幾mm瘦身成功，儘管大家都係410萬像素，機價又加多一隻大牛，大家都係奉「貪新忘舊」嘅原則，照買如儀！
不過大家可能忽略了最重要一點；一部DC取決相片優劣，其實是CCD！好多人都冇睇清相機嘅規格表，IXUS430的410萬像素是行較大的1/1.8"，相反後繼版的IXY50雖然都係410萬像素，但CCD是使用較小的1/2.5"！現時IXUS430水貨價$2,380，IXY50新機水貨價$2,880，你話世上邊有呢個道理！
CCD尺寸之所以愈大愈好，原理同菲林機一樣，你話135mm菲林靚定120中底正吖！CCD大嘅最基本好處，是吸光多啲、鏡頭又用盡啲、出嚟嘅成像Detail又多啲，後繼機=Upgrade？其實並唔係必然㗎！
文：DigiMan
現時的400-500像素數碼相機，CCD尺寸主要有三種尺寸，由大數到細，分別為1/1.8"、1/2.5"及1/2.7"，單以CCD而論，買機指引當然係買1/1.8"啦！講到舊機中嘅經典，不得不講CoolPix5000，500萬像素，但CCD竟然行極大的2/3"，好多人都話佢嘅畫質，比後面嘅CoolPix5400及5700更正！
如果𠵱家要玩2/3"大型CCD，可能要玩到上800萬像素級了，上個星期新落場就有部CoolPix8400，好多人都話佢反應極爽快，加上首部Prosumer機玩到上24mm（當年CoolPix5000都只係28mm咋！），真係極具吸引力。
《吹吹IT風》以討論及分析熱門IT話題為主，由電腦、數碼相機、手機、AV產品到TVGames，都屬討論範圍，歡迎讀者提出改善建議、討論話題、疑難雜症，谷氣投訴甚至自薦發表文章都得，總之大家多多交流。