佘詩曼與長居夏威夷的母親聚少離多，所以阿佘甚為惦念媽咪。由於其母過往多次忽然來港給女兒驚喜，故阿佘決意秘密學廚，炮製柚子大蝦沙律，以便他日親自煮給媽咪吃。
佘詩曼的媽咪因長居夏威夷，加上阿佘拍劇不絕，故阿佘自入行後，跟媽咪見面的時間愈來愈少。由於以前一直由媽咪照顧，佘母又愛下廚整幾味給女兒享用，所以阿佘也想自製美食給媽咪大快朵頤，早前她便秘密學廚，隨師學製簡單又好味的柚子蝦沙律。
看阿佘一副十指不沾陽春水的現代女性模樣，問她到底是否懂得下廚整幾味？她說：「我識㗎，冇媽咪咁叻之嘛，佢樣樣都識整，好犀利，重煮得好好味。我鍾意食媽咪煮嘅雞燉翅、番茄炒蛋同鮮蝦韭菜餃。」
阿佘坦言平日甚少下廚，即使從前跟媽咪同住時，她亦屬廚房稀客，阿佘笑說：「媽咪嫌我慢，佢會好欣賞我煮嘢嘅態度，但媽咪好性急，佢頂唔順就會出聲話等佢整。」
去年年尾，阿佘媽咪曾來港探望女兒，自此兩母女一別又是一年，暫時阿佘也不知何時會跟母親團圓，她說：「唔知㗎，媽咪好飄忽嘅，成日都畀啲驚喜我，突然喺我面前出現。因為佢知我忙，佢返香港，我要同公司請假、接機，所以通常佢都係自己返嚟，搵吓朋友，如果我有時間，就車佢周圍去咁囉。」
阿佘媽咪久不久才跟寶貝女相聚，但阿佘卻愈捱愈瘦，其母看見女兒弱不禁風的身形，不知會否戥她心痛？阿佘說：「以前媽咪都有講，佢話後悔叫我去選美，因為有段日子我踩住好多戲，個人好攰。但我會同媽咪講番，叫佢唔使擔心，我覺得冇乜嘢，因為我鍾意做。」
採訪：朱倬誼
攝影：林德雄
服裝：SistyrMoon
場地：Chilli&Spice（CausewayBay）
