曼聯後衞李奧費迪南教識我求大俠一樣嘢，原來解穢酒要去酒吧度飲，而且重要飲到凌晨四點。
李奧費迪南因為要喺禮拜二參加佢祖母嘅喪禮，所以冇喺禮拜二作客對布拉格斯巴達場歐冠盃，替曼聯上陣。李奧有正經嘢做，唔比賽都可以理解，但係點知佢俾人影到當晚去蒲夜店，重要玩到凌晨四點鐘至走；𠵱家佢俾人踢爆借佢過咗身嘅祖母過橋，除咗俾人鬧佢不孝之外，佢當然重要就自己嘅行為同曼聯解畫；或者佢會話係去酒吧度飲解穢酒，但我求大俠就認為，只有白癡先會信佢。
係人都知曼聯領隊費格遜一直好撐呢位二十五歲嘅英格蘭國腳，就算佢喺上季因為唔記得出席藥檢而要停賽八個月，照樣等佢刑滿復出，兼且重要冇怪過佢。之但係，李奧紀律向來唔係太好，好耐之前被踢爆玩雜交，又試過俾人影到成日由曼徹斯特返倫敦蒲。如果費格遜係想佢同曼聯好，睇嚟係時候出手，畀啲顏色佢睇吓，咪等佢以為自己得寵就亂嚟。
巴西前鋒辛尼安達臣闖戰歐洲多年，今季重有機會幫維拉利爾打歐洲賽，但最近都係決定加入「卡塔爾掘金行列」，目的都係為錢。但咪以為佢發錢寒，原來佢呢幾年要同老婆搞離婚，好多錢要使；佢重話當日由法甲聯轉投維拉利爾，同樣係為咗個「錢」字，算唔算係好男人呢？
雖然上季借去摩納哥有好表現，但係西班牙前鋒摩連迪斯今季返皇馬，仍然冇乜機會踢正選；近日有傳佢一月勢離隊加盟利物浦，但佢自己就話首選摩納哥，因為覺得同教練迪甘斯好夾。不過𠵱家摩隊前鋒線有人滿之患，沙維奧拿、捷雲頓及卡隆個個當打，摩連迪斯諗清楚先好。
孫繼海接受磁力共振後，曼城確認佢今季復出機會幾近無望，𠵱家最大問題喺老孫今季約滿，早前已經同球會傾續約，但目前嚴重受傷，續約真係唔容易；領隊基瑾表明開口幫老孫，尋求合乎雙方利益解決方法；因為曼城負債五千萬鎊，表明無錢羅致新球員，留住舊將好過無。
梅度雖然承認有食可卡因，但佢嘅足球事業未必因為咁而玩完。事關英職業足球員聯會有個計劃，只要吸毒嘅球員肯入療養院戒毒，就唔使停賽；而療程嘅時間雖然唔短，隨時一年半載，不過入療養院重好過停賽。聽聞梅度參加咗，𠵱家有機會改過自新，希望佢好好珍惜。