繼先科國際（724）復牌後，同樣係因為有位前董事被廉署調查而停牌的廣興國際（1131），在出咗份好長嘅通告，講明調查唔關公司事之後亦復牌。隻股停咗牌咁耐，兼且發生咁多事，噚日復牌股價當然勁插。
不過，廣興跌到低位仍然有人博反彈，但心水清如經紀黃就話博唔過，皆因廣興停牌前有個來自星洲嘅芬佬坐咗10％貨咁多，若果佢為咗避嫌或者要劃清界線，點都係率先沽貨為上。咁啱噚日廣興沽盤又係以星洲行為主，分分鐘係呢間星洲基金出貨都唔定。
星洲基金揸咗咁多貨，睇嚟噚日未必沽得晒，所以無謂冒險走去博反彈。廣興昨日最低見0.40元，收0.62元，跌幅高達61.49％，成交股數4759.8萬股，金額3029萬元。
另外，查理士．陳一系的保華德祥（498），在阿媽德祥企業（372）減持之後復牌，股價最高見過1.36元，收1.25元，升11.61％。本來小初以為係要咗貨嘅投資者想散貨，但經紀陳就話未必，市傳保華德祥重有古仔跟尾。
慕容小初