炒家買賣物業，消息愈嚟愈多，有「白旋風」稱號嘅資深投資者陳清白，金融風暴後，甚少踏足物業市場，今年開始，再轉高調。市場人士話，賣地前後，佢夾埋買入八件將軍澳蔚藍灣畔二手貨。
賣地前入貨，呎價約三千二，賣地後就要三千四。美記郭玉滿講，陳清白日前以二百三十萬，沽出蔚藍第五座低層E室，六百八十呎，賺三十五萬。
中記袁廣達話，經常現身，高調講自己買賣物業嘅投資者黎汝遠，噚日以一千零四十萬，沽出西灣河嘉亨灣第三座高層C，一千三百五十呎，一個月執一百二十三萬。
長實以往只係出動置業精英，通街派樓盤宣傳資料，但唔知今次係事有湊巧，定係有意，萬聖節前，竟然出動鬼妹，喺示範單位兼售樓處嘅尖沙嘴一帶，大街大巷向途人派發長沙灣宇晴軒最後一座御峰資料。
不過，大家就算做咗虧心事都唔使驚，因為派嘅時候都係日光日白，而且啲女仔重鬼咁靚㖭。蘭西心諗，啲途人攞資料，係因想睇靚女，定真係有心想買呢個盤呢？
噚日有八架法國戰機，喺本港上空進行花式飛行表演，咁新鮮嘅嘢，肯定啱晒香港人，發展商都唔執輸，利用呢個機會，宣傳吓自己個樓盤。
新世界營業及市務副經理李冠亮，聯同美記董事，喺南區香島道三十三號，一齊睇表演，證明樓盤係最佳觀賞地點。至於中記，就同新地喺鴨脷洲深灣軒睇表演。
雖然呢類表演「十年唔逢一閏」，但發展商都唔放過宣傳機會，令樓盤增加見報率。
「越級品牌」係代表質素同信譽保證，而喺十一月舉行嘅「香港超級品牌榮譽獎2004/2005」頒獎禮，總共有一百多個得獎品牌，再角逐組別大獎。
呢啲得獎品牌，總共分為十二個組別，其中地產組就有六項得獎，世邦魏理仕、中原地產、美聯物業、新昌管理集團、富城集團及中環中心。呢個頒獎今年已經係第二屆舉行。
自由行帶挈零售業，開舖頭做生意嘅賺到笑，搞到唔少人心思思，想租番間舖搞生意。美記食住呢個熱潮，辦咗個「開舖全攻略」創業講座，教新人點樣揀靚舖做生意。
美記黃子華除咗講解揀舖須知外，重教埋要賣乜嘢產品至掂，另有財務及租務條例方面要留意事項。原來出席者最想知道係點樣搞樓上舖。
黃子華講完之後，順勢提醒嘉賓最緊要快手，唔係租唔到舖。重話舖租易升難跌，一線舖租金上升，迫使租戶外移，估計會令二三線街舖租金升幅擴大。
環保係市場潮流，涉及嘅層面好廣，節省能源係其中之一。新地屬下兩家物業管理公司，啟勝與康業，齊齊參與集團搞嘅「節約能源比賽」，結果喺一年內，總共慳到二千一萬電費。
今次總共有二百個住宅屋苑及其他商廈參與，而慳得較多電費嘅物業，有西沙帝琴灣凱弦居、北角豪廷峯及元朗采葉庭。
呢個比賽係由新地推動，主席郭炳湘夫人親自出席頒獎禮。
電郵地址：
