選舉時行會成員梁振英一直追打劉慧卿，要同佢舉行論壇「討論」台獨問題，卿姐就為咗選舉經費問題，拒絕陪振英哥癲，因為根據振英哥建議請公關公司喺會展搞，要使成十皮嘢。
選舉過後，振英哥念念不忘「同劉慧卿有個約會」，卿姐噚日畀八方問起，非常勞氣話梁振英「好離譜！」佢話從未講過錢嘅問題，重即時摷本記事簿出嚟，話預咗對方會提、市民同記者或者會問，所以前綫執委會本月八日開會就傾過呢個咁嘅「約會」，與會者意見不一，最後議決不會主動重提呢件事，亦不會特別花錢舉行論壇，要搞，就星期日喺旺角行人專用區街頭搞，請梁振英出席，在市民面前決一死戰，卿姐一定奉陪到底。
傳真︰2623-9278
電郵︰