過氣流行樂天王米高積遜（MichaelJackson）雖然一直受到侵犯男童嘅官司困擾，但係佢仍然得閒同喺新MV《JustLoseIt》入面玩佢嘅Eminem鬧交，據知米高咬住Eminem唔放，重計劃召開記者會，爭取更多人支持佢。
其實又好難怪米高咁嬲，皆因一向鍾意得罪人嘅Eminem，喺MV入面扮咗好多以前米高嘅經典形象，又學佢以前喺廣告入面個頭着火，而相信最令米高唔順嘅就係MV最後影住扮米高嘅Eminem坐喺床邊，一班小朋友就喺張床上面係咁跳，擺到明諷刺米高嗰單侵犯兒童案啦！
唔肯罷休嘅米高聽聞已經搵到一向好憎Eminem嘅著名hiphop雜誌《Source》嘅負責人DavidMays同RayBenzino支持佢，佢哋三個計劃聽日會舉行記者會，推動其他hiphop界人士企出嚟支持米高，而米高預計會力數Eminem嘅MV種族歧視同危害黑人社區，務求令Eminem成為黑人公敵。而今次《Source》可謂一舉兩得，因為雜誌下一期會以米高做封面人物，絕對可收宣傳之效。