隔晚美股上升，港股擺脫頹勢高開，但下晝3點之前，幾乎打回原形。3點過後，歐洲開市，法國、德國升幅接近1.5%，英國亦有0.5%，又再帶番起港股。昨晚美股若再升多一升，油價若再跌多一跌，港股有機再試月初高位，即係13400嗰頭。恒指昨日收報13154。
長實C輪：兩幅地皮上周二高價成交後，大隻地產股嚟一次反智走勢，有專家連發霉麵包理論都搬埋出嚟。地產股消化一輪，再度有勢。長實（001）升0.50元，喺「各大」之中升得最少，有機會跑番快啲，搵C輪短炒，贏面大。
長實C輪正路之選係2249，明年2月到期，輪價44仙，溢價6%，槓桿率14.9倍（有效8.3倍），引伸波幅26.9%。條數最接近2249嘅係2258，2258溢價較2249高0.9個百分點，比拼之下，揸2249着數啲。
滙控C輪：滙控（005）收126元，升1元。月初到前日，滙控只曾試過1日收126元。今回喺英美滙控股價帶動下，有機會破位，今年3月高位129元可能好快再見。
滙控C輪想博高回報，主角之選係4441，數據勁靚，明年6月到期，輪價51仙，溢價2.4%，槓桿率24.7倍（有效12.7倍），引伸波幅12.9%。條件相近嘅有4445，4445溢價高1.1個百分點。4441溢價如果相同，則輪價較現價51仙高出接近兩成。
恒指C輪：大市若果繼續去，搵恒指C輪短炒，最佳對象係9911，輪價16.8仙，槓桿率18.2倍（有效12.6倍），夠晒爆炸力，引伸波幅18.6%，年底至到期，畀1.3%溢價抵到爛。
章盛