精明消費：
添置戶外家具露台吹風悠然自得
潮流興與大自然全接觸，所以新推出的樓宇大都力Sell環保露台，連帶戶外家具都忽然興旺。家有露台或大花園的人士，大都願意花費金錢為露台又或花園布置一番，若然家中沒有露台或花園，亦可選購便攜式的戶外家具，放假帶去郊外，實行喺呢個秋高氣爽的季節，齊齊享受一吓大自然。
記者：黃婉冰
攝影：伍慶泉、蔡鴻雯、陳智良
ImageGirl：Katy（StarAsia）
精緻小枱櫈放露台至啱
屋企有個環保露台，添置一兩張小型摺枱、茶几或櫈，就可以享受涼風歎吓茶。想為自己做一個小型露天Cafe？以下有多款小型戶外家具，不妨慢慢揀！
希臘風情：希臘彩磚鮮豔奪目
枱尺寸：直徑63.5×高18.6cm
充滿藝術氣息的希臘馬賽克小枱櫈，以彩磚鑲嵌拼砌出色彩斑斕的圖案，令人即時想起希臘的白色小屋，枱櫈均可摺合。
枱連2張摺櫈：$1,230(b)
的骰小童公園家具
櫈尺寸：長43.5×高53cm
茶几尺寸：長42.5×闊42.5×高38cm
以鋁合金及實木製成的小童公園櫈，塗上古銅色的椅背綴以動物圖案，賣相古典得意，可以買埋同質料製的矮茶几。
櫈：$350(c)
茶几：$380(c)
柚木營造自然層次
茶几尺寸：直徑49×高46cm
由柚木製成的矮茶几和摺櫈，木色深淺不一，經鑲嵌後很自然地營造出層次感。
茶几：$650(c)
木櫈：$950(c)
大型戶外家具自製小庭園
屋前有花園仔，唔用好浪費，何不布置得靚靚哋，隨時可以享受日光浴，又或者招呼朋友BBQ。要自製一個小庭園，又點少得大型搖椅、野餐枱、沙灘椅、太陽傘等設備？以下精選幾款，有慳位型、舒適型及功能型，你又想搵邊一款？
菠蘿格實木
茶几尺寸：直徑66×高68cm
以台灣菠蘿格實木製造，配合外形設計粗獷的茶几及摺櫈，效果富東南亞風味，茶几及木櫈均可摺合。
茶几：$500(c)
木櫈：$380(c)
破格前衞膠枱櫈
枱尺寸：長79×闊79×高74cm
家居屬前衞設計，這款膠製枱櫈就最啱，流線型設計的armchair，絕對是破格之作。四方枱糅合鋼、膠兩種元素，無傳統白色膠枱咁土氣。
膠枱：$1,860(e)
armchair：$1,500(e)
抵買：全包套裝最實惠
枱尺寸：直徑88.5×高69.5cm
太陽傘尺寸：高230cm
所謂全包，即一個價錢有晒四張摺櫈、一把太陽傘及一張圓玻璃枱。一次過買晒，唔使東買一張，西買一張，幫你襯埋，乾手淨腳又慳時間。
售價：$2,200(c)
三座位搖椅坐得舒服
尺寸：長198×高122cm
三座位格仔搖椅，椅套用上防水質料，長期放露天地方都唔怕，附設太陽擋，幾曬都無問題。
售價：$2,200(b)
附設活動太陽擋
尺寸：長76×闊60cm
怕曬又想享受陽光與清風，這款附設有活動式太陽擋的沙灘椅就最適合。太陽擋、椅背都可調校高低角度，將椅背放低又可變沙灘床，摺合式設計收藏慳位。
售價：$880(b)
實用儲物花園櫈
尺寸：長120×高78cm
日日本製花園木櫈，將儲物格與花園櫈二合一，揭起座位的面板，儲物格就會出現，淺淺哋可用來放濕碎雜物。
售價：$800(b)
摺合式枱櫈易收藏
枱尺寸：長122×高75cm
花園空間不大又想隨時有枱櫈可用，提議選購這款可摺合的枱櫈組合。以不碎膠製造，不用時可將枱腳摺叠收起，連同摺櫈一齊收藏依然慳位。
長枱：$750(b)
摺櫈：$200(b)
公園櫈變野餐枱
尺寸：長139.7×高85cm
日本製實木枱櫈組合，一枱連兩櫈設計，摺合起來又可變成一張公園櫈。只要將兩邊手枕托起一拉，就可將公園櫈變成實用野餐枱，開合簡單容易，設計慳位。
售價：$1,800(b)
摺合枱櫈帶去郊外好方便
「秋風起，燒兩味」，秋涼熱門戶外活動首選BBQ，霸爐已經夠煩，重要霸埋枱櫈就更煩。最折衷方法都係自攜，所以市面有多款不同質料、設計的摺合式枱櫈組合，摺起後方便攜帶！
長枱組合大張好用
枱尺寸：長113×闊59×高72.5cm
櫈尺寸：長95×闊22.5×高42cm
膠長枱連兩櫈組合夠晒大，帶去郊外BBQ最適合。兩張長櫈摺起後可收放在枱底，再收起枱腳，成套組合抽起就走得。
一枱兩櫈：$1,200(c)
輕便摺枱的骰實用
尺寸：長60×闊79×高67cm
去郊外野餐，可以買張鋁質輕便枱，矮身又細張，容易放入車尾箱。只要將兩隻枱腳向內摺就搞掂，設有手挽，拎住周圍去又輕又慳位。
售價：$149(a)
輕便推介：最輕便鋁枱組合
尺寸：長80×闊60×高70cm
一枱兩櫈的鋁質枱櫈組合，摺櫈摺起可放在枱底，將枱面摺合後外形有如公事喼，備有手挽設計。枱面用上防火膠板，耐用好睇。
原價：$399
特價：$299(a)
枱櫈合一坐得穩陣
尺寸：長85.5×闊69×高70cm
摺合式膠枱連櫈設計，兩邊長櫈同枱連接，只要有人坐住，膠枱櫈可避免因輕身而四圍郁，枱中央可用來插太陽傘。
原價：$199
特價：$159(a)
店舖資料
(a) 實惠 銅鑼灣怡和街1號香港大廈地庫 29237010
(b) 大新帆布帳蓬 旺角亞皆老街122A號地下 23046345
(c) 萬寶創作產品公司 西貢普通道23號地下 27927679
(d) 吉之島 28846888
(e) G.O.D 銅鑼灣禮頓中心（霎東街入口） 28905555
厚身布料坐得舒服
尺寸：闊88.9×高96.5cm
嫌普通摺櫈唔舒服，不妨試試這款舒適摺櫈。選用較厚及軟熟的布料代替帆布料，把手位更設有杯座，完全舒適享受。
售價：$129(d)
又輕又細攜帶方便
尺寸：闊30×高63cm
這款三腳設計的帆布摺櫈，的骰又夠輕。一攞起就會自動收合，摺起後Size非常細，可輕易放入背囊，而且重量夠輕，揹埋去行山都不成問題。
售價：$20(b)