45條關注組幾位大狀當選後忙到氣咳，呢兩日要飛上北京同京官會面，但為配合入伙吉時，噚日特登上去位於花旗銀行大廈嘅聯合辦事處搞個微型入伙儀式，象徵式咁行個圈坐一坐，每人食件餅當做開工大吉，事關大律師公會主席陳景生有言在先，話噚日朝早十一點係好時辰，吉時入伙日後實有貴人幫助。
查實呢個辦公處要幾個星期後先可正式入伙，梁家傑話會喺九龍東租個臨時辦公室先，因為已經接到唔少市民投訴個案，要搵個地方接見市民。
又湯家驊就今日辯論嘅公平競爭法提出修訂，將李華明嘅動議，刪去「研究制訂公平競爭法例的可行性」一句，差啲同民主黨反晒面，身為泛民主派召集人嘅劉慧卿承認，7.1連線嘅政綱中有寫明「我們希望訂立公平競爭法」。卿姐話，係咪貨不對辦，就要記者自己問湯大狀，但泛民主派一早都有晒心理準備，大家嘅立場未必一致。
（圖）45條關注組議員聯合辦事處噚日擇吉時入伙，幾名大狀（左起）梁家傑、湯家驊、吳靄儀及余若薇食蛋糕慶祝。
馬泉崇攝
傳真︰2623-9278
電郵︰