五十七歲的林先生，近日無故在家猝死，家人傷心欲絕。幼女阿玲現與女兒相依為命，依靠綜援金度日，無力殮葬亡父，彷徨無助。蘋果日報慈善基金即時撥款，助阿玲支付購買亡父靈位及骨灰龕的開支。
「嗰日知道爸爸死嘅消息，好突然，因為佢向來冇乜病痛，我根本接受唔到呢個事實。」阿玲歎道。
「細個嗰陣爸爸好錫我，帶我返學、陪我去公園玩，雖然屋企唔係有錢，但佢間中會買衫、玩具畀我。𠵱家爸爸走咗，我唔敢話畀媽媽知，驚佢受唔住刺激，影響個病。」三十一歲的阿玲向記者道出與父親林先生昔日的生活片段。
阿玲年幼時，雙親仳離，她與兄長由母親獨力撫養，數年前，兩兄妹相繼成家立室遷出，其後，母親患上精神抑鬱症，須長期服藥控制病情，現於療養院休養。
阿玲表示，雖然父女分開，但會不時見面、互相慰問；近年，其父經常往返內地從事貿易工作，父女聚少離多，大部份時間以電話聯絡。近日，林先生在內地工作期間不幸猝死，阿玲接獲父親的死訊後，心情良久未平復。
林先生的遺體早前在內地火化，阿玲無力支付有關費用，靠內地親戚借貸應急。日前，阿玲帶同亡父的骨灰返港，她歎道：「我好希望盡一點孝心，等爸爸早日上位，但𠵱家我重欠親戚錢，好難再問人借錢應付爸爸上位嘅費用。」
阿玲曾從事製衣工作，丈夫任職貨櫃車司機，育有一名現年四歲女兒，早前，夫婦關係破裂，她為照顧女兒，無法工作，母女依靠綜援金維生。
阿玲表示，女兒出世後健康一直欠佳，經常發燒及感冒，須長期求診中、西醫，每月醫藥開支花費不輕，令生活百上加斤。
「囡囡成日病，試過睇咗幾次西醫都唔好，後嚟轉睇中醫，病況慢慢好轉，但每次診金連藥費起碼要幾十、或者百幾蚊，我好多時惟有喺食方面再慳啲，想儲錢就冇可能。」阿玲憂心忡忡地說。
阿玲的兄長在內地工作，月入僅足餬口，本身亦自顧不暇，口袋難有餘錢辦理亡父的身後事。
蘋果日報慈善基金有見阿玲的經濟苦況，即時從「殮葬專戶」撥款一萬元，解其燃眉之急。
捐款編號：C1535
暖流熱線
電話：29908688
傳真：23702192
電郵：
網址：
