拜仁慕尼黑同德國國家隊今次慘啦！佢哋嘅天才中場戴斯拿因抑鬱症翻發，𠵱家返咗精神病院接受治療，唔知幾時先至可以返球場比賽。
原本會喺噚晚對祖雲達斯場歐冠盃上陣嘅戴斯拿，前日晏晝同拜仁教練馬加夫同經理漢尼斯講自己好唔掂，於是拜仁安排佢由意大利返德國，搵睇開嘅醫生賀斯保亞教授幫手。
上屆因抑鬱症唞咗大半季嘅戴斯拿舊病復發，係因為拜仁同德國對佢抱好大期望，但佢覺得自己表現達唔到要求，壓力愈嚟愈大，搞到病發。由於佢被認為天才球員，所以拜仁同德國隊都諗住以佢為核心建立球隊；𠵱家佢唔知幾時先可踢番波，打亂晒拜仁同德國嘅部署。
截稿前唔知祖記對拜仁係乜嘢戰果，但戴斯拿知自己唔妥，勉強落場亦只會令球隊打少一個，主動提出退隊，咁做算有品。雖則𠵱家資訊發達，上網可睇到最新軍情，但如佢早一日講，我求大俠就可以報料，等讀者唔使做盲頭烏蠅。
國際米蘭早前捐咗七萬港元同埋一部救護車畀墨西哥一支游擊隊，俾人鬧到七彩，話佢哋唔應該同政治拉上關係。雖則話「人做我唔做，殺出新血路」，國米用呢個方法嚟證明佢哋有一顆幫人嘅心，真係有點兒那過，有錢應該幫啲窮人、病童或者其他有需要幫助嘅人。
卡斯辛奴今季好似失控咁，成日扭計發脾氣，冇一個教練搞得佢掂；其實佢咁樣不外乎嫌人工奀，而羅馬方面亦終決定周三同佢傾新約，將佢人工加到去托迪嘅年薪三百五十萬鎊（約五千萬港元）級數。我求大俠覺得羅馬可能係搵錢嚟嘥，轉頭佢又再扭計又點算呢？
中超聯近排認真多麻煩嘢，除咗北京國安醞釀退出、球員喺球場上互毆同埋球會要求中國足協公開盤數外，深圳健力寶班球員又因會方半年冇人工出而罷練。中超聯如果搞到一鑊泡，對中國國家足球隊影響好大；莫講話國足想衝出亞洲，連想同日本同埋南韓睇齊都唔使諗。
前晚場英超聯，有個講波佬成日將加拿、迪科及京治幾個黑人球員撈亂已經夠瘀。熱刺後備卡域克上場樸茨茅夫球迷狂噓；因季初「老樸」幾乎簽成佢，點知最後揀熱刺，「老樸」球迷自然當佢反骨仔。個評述員聽到大驚小怪，猛問點解，又話唔通啲球迷同佢有仇，唉……。