港股反彈，力度比預期為強，恒指高收13154，升119點，期指更強，搶上13220後收13200，大升183點，變番高水46點。大市噚日早段牛皮反覆之時，成交只64億元，但午後一轉好市，成交立即大增，顯示有唔少人等機會入市。
噚日升市，暫時仍當反彈視之，但若升幅夠大，即係恒指一舉而升上13200之上，則有機會扭轉跌勢，而後市亦可望重拾升軌，初步估計未來兩三天仍會係好市，但到下周四期指結算之前，市勢會轉為反覆。
上升股（不計認股證）有350多隻，其中以澳門概念股的表現最突出，最勁係嘉華建材（027）呢隻準注資股，整固完後一升，又33%，世紀建業（079）升28.8%，新濠（200）亦有11.8%進帳。遠東發展（035）破位而上後，噚日高收2.175元；其實，遠展嘅澳門概念亦好「煞食」，將同金沙合作興建一大型綜合度假園，包括3間酒店和商場，投資15億元。以遠展未來5年盈利能力咁強，PE咁低，再加上熱炒的澳門概念，相信年底前已有機會上3元水平。
早輪推介的中信21世紀（241），噚日終於發力，搶上1.43元高收，升8.3%，成交更大增到5500多萬股，強大動力支持升破三角形阻力，照度上去，短線目標指向2.0元。聽講中信集團現有的「產檢網」同「藥檢網」，會係下兩個注資嘅項目，而「級數」亦比之前兩個項目（鴻聯九五和東方口岸）更高，「晒士」更大，21世紀股價日後好大機會翻幾番。
國企在午後突然轉勢，掃到高收。吉林化工（368）整固完成，升勢再起，且有大成交支持，短期量度上升目標2.3元；升破前高位2元後，可以加碼，再賺多15%。
吉化再起步，PE同樣好低嘅北京燕化（325），亦已蓄勢待發。燕化暫時仍受制徘徊區3.25元的上阻力，但吉化若能起帶動作用，則燕化破位而上，只係遲早問題，下一個位，起碼見3.8元。
04年度（12月年結），保守估計燕化盈利22億元人幣，大升246%，每股盈利0.607港元，即使以股價3.8元計，PE亦只6.2倍！
郭兆誠