○七○八雙普選，雖經由中方出動口水護法強力鎮壓，但○七○八直選並無違反基本法規定，連中方都唔敢否認。可能見到江澤民落咗台，於是有啲政治觸覺敏感人士，例如有「小長毛」之稱嘅張超雄，喺立法會政制事務委員會提出：諮詢民意，最好就係全港公投。
其實「小長毛」張超雄冇講錯：○七○八普唔普選，想知道真正之民意，公投就最公道。點知煲呔面黑黑咁喺立法會宣布：公投會將特區推向一個不現實之邊緣。
何須怕得要死，唔通一公投，親中老左保皇黨就一定輸硬？保皇黨大把資源，可以派飯盒、租巴士組織返東莞食荔枝，對於以北角為基地嘅維園阿伯、低教育水準居民，佢哋俾港英蝦足幾十年，最注重嘅就係溫飽權，公投有飯盒派，有免費旅行，就算叫佢選波爾布特做特首都得。今年立法會選舉，喺強大嘅飯盒攻勢之下，連鄉音未改嘅蔡素玉都贏得出，又點知公投嘅結果，唔係應該到三○二一年先至應該有普選？
又或者「公投」兩個字，遭到台灣總統陳水扁濫用，畀人一種錯覺，覺得公投就即是台獨。咁陳總統喺總統府開飯，一樣係用筷子，佢去大便，亦一樣係用西式抽水廁，咁係咪即是以後全國十三億人兼特區六百萬市民，一律要棄用筷子，應該改用左手拿飯食，兼改用踎廁，先至叫做同台獨劃清界線、支持祖國統一？
至於煲呔蒲頭抗擊張超雄，喺中央人民政府心目中，加多兩分。冇錯嘞，喺呢個時候，邊個出嚟硬接大小長毛啲怪招，挺身同中方食力，邊個喺下屆特首嘅婦女銀袋賽，就會更加有機。鬍鬚雄嗌公投，本來當日林公公、唐唐、太子章等就應該齊齊強硬回應，加埋親中嘅呂明華，應該齊聲謾罵張超雄反中亂港至啱，有乜理由咁失策，一係冇聲出，一係就推諉，卻原來開會人數唔齊，立場曖昧，俾煲呔抱僵突圍？執輸行頭，又點做特首？
至於○七○八普選經中方鎮壓，係咪無望呢？又唔可以咁講。因為呢樣嘢係老江時代遺留嘅穢物，現時係胡溫新揸莊。胡溫一上台，已話洗完白白，大陸民間即時出現釋放趙紫陽嘅呼聲，重有人醞釀聲討將烏蘇里江及黑龍江一百五十萬方公里雙手奉送畀俄國普京嘅賣國行為㖭（普京一聲唔該，笑納中國領土，不過輸送石油就冇得傾，激到溫家寶紮紮跳），呢啲無理要求、反華言論，喺阿江未落台嗰陣邊個敢出聲？
傳真︰2623-9278
電郵︰