林保怡喺《金枝慾孽》飾演孫白颺，演技獲得一致好評，唔少人認為保怡今年大有機會喺無綫台慶攞「我最喜愛男主角」大獎，但保怡唔係無綫自己友，所以未必會畀獎佢咁話。
不過，保怡重有半年就同經理人公司M8約滿，早排佢已經爆響口話唔再續約，馮仁昭聽聞無綫近日已經同保怡秘密傾約，據知保怡簽無綫做經理人嘅成數都好高，換言之，男主角獎對保怡嚟講，幾乎係垂手可得。
另外，噚日保怡同張可頤、邵美琪喺大埔火車博物館拍攝劇集《諜變危情》節目巡禮，保怡飾演一個軍官兼特務，而張可頤亦都係一個特務，噚日場戲講可頤喺火車站俾人追，可頤為咗避耳目，惟有向保怡投懷送抱。可頤噚日大大話話都跑咗十幾次，跑到成身汗之餘重唔小心仆親，但佢都好鬼硬淨，只係清理下傷口就繼續開工。
劉若英前日喺北京舉行其個人演唱會嘅記者會，順便宣傳埋佢嘅新碟，劉若英近年主演咗唔少電視劇，喺內地都有幾唔錯嘅反應，知名度大增，所以甚受內地嘅觀眾歡迎，而喺前日嘅記者會上，連近日是非多多嘅趙薇亦抽空出席，為好友撐場。
韓國女星金喜善同成龍拍嘅新片《神話》最近遇到一件頭痛嘅事，原定呢個月中會去雲南繼續開工，但係噚日內地嘅報道，就話片中嘅女主角金喜善因為合約期滿，要離開劇組返韓國，所以迫住要停拍，劇組亦已經暫時解散，有傳導演唐季禮將會就呢件事同金喜善所屬公司交涉。
那英日前喺北京生咗個仔，那英噚日接受台灣主持長途電話訪問，佢用普通話講：「兒子的長相很像高峰，我生完孩子要吃藥，所以暫時不能餵母奶。王菲最近去完巴黎，她昨天來探訪，帶了從巴黎買的童裝給BB做禮物。」
莫文蔚噚日喺尖沙嘴出席「西湖情．情繫香港．2004玫瑰婚典」活動，莫文蔚幫六十二對內地新人證婚，佢話：「我第一次做證婚人，見到咁多新人，感覺好溫馨。」莫文蔚重話暫時冇結婚嘅打算，𠵱家工作至上，搵錢第一咁話。
梁靜茹前晚順利完成喺台大綜合體育館嘅兩場演唱會，之前話李宗盛會做第二場嘅嘉賓，房祖名亦會捧場，但佢兩個都缺席。不過周華健就帶咗支結他送畀靜茹，都算有心，而靜茹就一度喺表演時，被歌迷感動到眼濕濕，做完演唱會後，喺後台喊咗十幾分鐘。
