澳門賭業概念股炒咗咁耐，終於見到有幾間外資證券行出報告推介新濠國際（200），目標價重睇到10元樓上，令到新濠繼續熱炒。大行火上加油，所以實在唔難理解澳門賭業股可以炒得咁瘋狂。
就算只係話研究緊注入賭業，連時間表都話欠奉的嘉華建材（027），股價都可以勁升33％咁多，收2.25元，成交金額高達1.57億元，完全唔係乾炒。但小初就覺得，就算最實在的新濠，佢哋喺澳門的酒店連賭場，好似都要在後年年底先至起好，𠵱家已經炒得咁過份，唔多唔少都有泡沫成份存在，真係要小心小心。
另外，經紀陳噚日同小初講起添發慶豐（661），早排股價不斷被質低，但近排就見反彈，並且剛剛在股東會上通過改名做中國信息資源集團。
經紀陳話，呢隻股早排被質，原因係有個大戶水緊之故，但據講近期已經搵到新水源，所以股價止跌回升，加上又適逢改名之喜，所以順勢在噚日開車炒一轉，抽高12％，收0.56元，成交股有940萬股，金額494萬銀。
慕容小初