面對企業削減房屋津貼，太古地產落本全面翻新金鐘柏舍與曦暹軒兩幢服務式住宅，令租金可以逆市升五至十巴仙，每呎四十五至五十蚊。
太古租務經理林柏年，噚日大力宣傳新裝修特色，帶傳媒參觀柏舍其中四個示範單位。不過，拒絕透露翻新工程費用，只話係太古一項重要投資。預計出租率與總租金收益一律欠奉，只話翻新後單位增加二十七個，至二百七十個，由約六百呎至複式三千餘呎。
按太古舊紀錄，柏舍總樓面四十四萬三千呎，曦暹軒約十七萬四千呎，參照最新公布嘅租金叫價，若全部單位租得出，每年租金收益超過三億。
蘭西參觀過由裝修、廚具到家具全部換過新嘅示範單位後，都知所費不菲，現單位租金叫價六萬幾至十五萬幾，最少幾個月租金至夠冚，租客可謂變相賺幾個月免租期。
上海乃國際化大都會，有唔少海外僱員聚居，支持豪宅租務，空置率第二季為十七點九巴仙，第三季大降至十二點六，租金升一巴仙，每呎十七個二。高力報告，空置大幅改善，因為海外僱員配合仔女開學，揀暑假至搬屋。不過，明年唔少豪宅與別墅落成，預期空置率升至兩成，對租售價都構成壓力。港客想投資或承租上海豪宅，需要留意。
至於北京豪宅，租金下跌幾季之後，第三季平穩，地點與條件好嘅，好似建外SOHO、國貿公寓、雅詩閣及裕京花園，非常硬淨。
鷹君百億項目旺角朗豪坊，到咗最後衝刺階段，陸續開業，鷹君助理董事李澄明話，佢幾乎日日都喺現址打躉，既帶客睇展覽室，又傾租約，好唔得閒，食飯惟有喺酒店搞掂。
佢噚日向記者介紹完商場與寫字樓之後，食晏時猛咁推介酒店嘅嘢好食，講得頭頭是道。
佢老細羅嘉瑞一樣咁緊張，不時都到場視察，噚日見佢喺朗豪酒店食晏。聽講，佢對朗豪坊嘅食物都好關注，重會親自試菜，確保有水準。
電郵地址：
