大狀收費一向黑箱，外界一味估估吓，不過鄉議局噚日有份文件，就爆咗大律師公會主席陳景生嘅收費，原來陳大狀每粒鐘要收一萬二千蚊，搵陳大狀寫份法律意見，就要收十八萬蚊至二十萬蚊！陳大狀做一個鐘，已經係7.11收銀阿嬸嘅一年工資，分分鐘兼埋議員，做大狀真係發過豬頭炳。
鄉議局自稱唔係同陳大狀作對，劉皇發同八方講，事因鄉議局同政府就補地價問題有糾紛，想問法律意見，當然要搵「大」大狀陳景生啦，加上陳大狀過往同新界人打贏唔少官司，係不二之選，但係聘用佢要喺會上通過，所以就要列收費出嚟啦。佢重話，大狀價錢係海鮮價，今次已經收平咗啦！
發叔又唔使牙痛咁肉赤喎！𠵱家啲新界鄉親咁有錢，大狀收得貴，即是睇得起新界人，收得平，即是係體恤新界人窮，唔好咁多怨言嘞。
傳真︰2623-9278
電郵︰