中貿M十年前去大陸某地，近住佢鄉下發展地產，搞咗幾年都冇結果。前年開始，中貿M唔再倚賴內地啲老友?夥計，自己一個星期上去四日，香港啲生意就交畀夥計睇住。咦，有進展喎，中貿M話見到隧道嘅盡頭嘞。
中貿M對左丁山講：「力不到不為財，冇錯嘅。我以前交畀一啲話自己可以打通天地線，周身關係嘅人搞，用咗唔少錢去請客疏通，呢樣嗰樣，錢用咗唔緊要，但硬係原地踏步，寸步難移，浪費晒啲時間。我親自上去坐鎮之後，日日照足本子辦事，去官府磨爛席，依正手續文件，哈，原來中國都可以依法辦事嘅，只係慢一啲啫，你有耐性就得。去得衙門多，就知道點樣可以利用潤滑劑，加快行事，唔須要使咁多搵上頭。譬如我遞表入去，只要求衙門蓋一個印，蓋印可以搞足一日，佢一定依正手續檢驗文件辦事嘅，你咪慢慢等囉，後來我發覺有人畀五十蚊，蓋印可以一個鐘頭內搞掂，我梗係照辦煮碗啦。後來『收租佬』話畀我聽，五十蚊要分畀好多個人，一人最少收一蚊，譬如揸住個印嗰位小姐，每蓋一個印就收一蚊。嗰位小姐聽命行事，職位甚低，月薪六百元，但每日蓋二三百個印，就收入二三百蚊，幾肥㗎。」
唔怪得唔少內地人來港自由行，買貨絕不手軟，因為財來自有方嘛。中貿M話：「喺國內投資，要經常親身拜訪衙門，叫夥計去，啲當權派唔理睬㗎。我鄉下嘅市長就問過我，F家喺香港係唔係幾巴閉，我話F家有頭有面，已故F老爺無人不識。市長講：『我理得F老爺生前幾威，F公子次次都叫夥計嚟講投資，自己唔到，我就睬佢都嘥氣。』做中國生意，走少一步都唔得！」