與金王M食午飯，金王M猛咁叫左丁山買金，話明以後十年黃金不會變爛銅，長揸長有，佢重話：「講十年黃金變爛銅嗰位仁兄已經在金融圈失蹤啦，你聽我好過聽佢嘅過時口號。我就話黃金一定衝破五百美元一安士，你如果甘心於做一年存款，不如索性買黃金，回報率在一年內肯定高過一年港紙定期嘅十倍八倍。」咁樂觀，唔敢駁嘴，因為金王M入行三十年，見過黃金炒上八百美元一安士，亦經歷黃金價大瀉、大牛皮，現在索性唔做客戶生意，閂埋門自己炒，費事俾啲客戶煩親喎。
如果金王M預測正確，曹仁超嘅每月一金幣政策就發達咯，佢幾年來不斷累積黃金，曾經公開講過手頭上已儲蓄咗二千両，真係唔講得笑。金王M就買得更多更厲害，斷估唔會三十年道行一朝喪啩？
貴重金屬嘅走勢通常係大起之後大跌，跌定就會牛皮牛幾年，牛皮到你暈，再冇留意之時，就乘住物價通脹之時，一飛沖天。目前石油價格高企，屢創新高，似乎大形勢好有利黃金噃，可惜金價在二百八十美元一安士之時，左丁山重未認識金王M，以目前嘅價錢（每安士四百一十八美元），驚驚哋。
食飯所在地可以聽見好多人講嘢，於是聽到隔籬卡位嘅一把聲係議員H。佢不斷批評老董，唔知道隔牆有耳，好彩香港係言論自由地方，聽到都冇所謂。某日在公眾場合，聽到議員L話：「六十位議員之中，唯一能夠講中英法三國語言嘅，你估係邊個？」好多人估啲大律師，原來唔係，答案就係長毛！議員L話：「長毛其實喺蘭桂坊識過好多國際女朋友，語言能力幾高㗎！」