精明消費:<br>05年月曆大檢閱立體公仔脫穎而出

精明消費:
05年月曆大檢閱立體公仔脫穎而出

每年一到十月,經過書局、報攤就會見到由不同人士推出的來年運程;行過精品店就會見到各適其適的來年月曆。今年也不例外,市面的05年月曆已排山倒海推出,由座枱款、掛牆款到夠晒環保的萬年曆都有齊,有前衞設計亦有卡通Character,男男女女,大人細路都啱用!
記者:黃婉冰
攝影:伍慶泉、蔡鴻雯
ImageGirl:Chrissy(StarAsia)

座枱月曆立體造型最煞食
座枱月曆是辦公桌及書枱必備品之一,唔講究,可以搵個某某公司送嘅贈品頂檔,講究的話,單係款式都有排你揀。普通揭頁款式未能引起你的興趣?重有好多立體Character,甚至毛毛公仔款式畀你揀,其外形款式靚到可以做埋擺設,問你點忍手唔買?

超過癮:巨型變臉皮禮士
22cm高的巨型皮禮士糖月曆,造型絕對攞滿分。五顏六色的日期就好似一粒粒皮禮士糖,日曆用插卡式設計,最特別係可以幫佢改頭變臉,鴨仔、橙樣、綿羊仔,三個頭任你換,賣相夠晒盞鬼。可惜,內裏無皮禮士糖,有埋糖食重正。
售價:$135(a)

Fans必掃:做埋Memo夾
Sanrio最新座枱月曆,立體公仔造型夠突出,月曆用上夾形設計,比普通四四方方的座枱月曆特別。一年過去後,又可以用來做Memo夾,絕對唔會嘥,除Kitty外還有多個Character任你選擇。
售價:$53.5(e)

唔做月曆做相架
迪士尼經典卡通《木偶奇遇記》,主角Pinocchio變身成圓碌碌小木偶,坐在以星星夜空做背景的月曆旁,造型得意。攞走月曆卡,放入相片又可以變成相架,一物二用。
售價:$95(a)

BARBAPAPA掛牌示眾
迷人PinkLadyBARBAPAPA,全身軟綿綿。肥嘟嘟的粉頸掛上迷你月曆,一個月一張,單憑這身裝束,已可在芸芸座枱月曆中脫穎而出。
售價:$95(a)

七彩蝴蝶別具心思
七彩蝴蝶形月曆,張開放在枱上,效果就似一隻擁有兩種不同顏色翅膀的大蝴蝶。每頁用上不同顏色,簡單有心思,擺喺枱頭實搶晒鏡。
售價:$85(c)

一眼睇晒三個月
這款HelloKitty座枱月曆,最大賣點在於可同時掛上三個不同月份的月曆,一眼睇晒三個月,唔使揭來揭去咁麻煩。有埋一格格可以畀你寫低每日重要事項或特別日子,一目了然。
售價:$40(b)

布雞仔反璞歸真
立體布雞仔雖然稱不上手工精細,但反而給人簡樸之感,加上恍如出自舊式打字的日曆字體,效果就像一個DIY製品。月曆兼備日本節日,追求東瀛文化之人必定適合。
售價:$120(c)

醒你金句:火柴人日日有金句
叫得做一本開心,當然會令你睇得開心。每頁都由主角火柴人撐場,每日更會送上不同的勵志、搞笑金句,重有埋中英對照,插圖背景夠晒寫實,幾有意思!
售價:$99.9(d)



掛牆月曆圖畫豐富似掛畫
屋企用月曆,多數會揀掛牆款式,貪佢掛喺牆上人人見到,而且慳位美觀。新款掛曆愈出愈多,卡通人物、日本Character、動畫等應有盡有,圖畫精美到可以當埋掛畫或裝飾,連性感月曆女郎都要行埋一邊!

玩款金屬格仔
男孩子怕用公仔月曆俾人笑,呢個簡約設計的銀色格仔月曆,重金屬效果充滿剛陽味,Design前衞有Style。月曆兩則有橡筋箍實,以防日曆卡會走位,一格格清晰易睇。
售價:$80(c)

創新設計:軟腍腍枕頭
呢個係枕頭、月曆抑或係明信片?其實三樣都係,枕頭外形一面係月曆,另一面可以寫上語句,當成明信片寄畀朋友;掛上牆就變成掛曆,實用有新意。
售價:$25(c)

米奇老鼠填色冊
想幫小朋友的房間添置月曆,呢款米奇老鼠大掛曆就啱晒。每個月有不同主題圖畫,每頁背後重有圖畫畀小朋友玩填色,做完月曆又可變成私人填色冊,小朋友實鍾意。
售價:$140(a)

宮崎駿動畫冊
以宮崎駿家傳戶曉的動畫做主題,有《龍貓》、《歲月的童話》、《魔女宅急便》等,就連未上映的新作《哈爾移動城堡》也有,儼如一本日本經典動畫圖冊。
售價:$250(a)

日本花之月曆
設計清雅脫俗,全個月曆都以花為主題,每個月都以一朵具代表性的花為背景圖案,是愛花之人的首選。以日文為主,睇唔睇得慣就見仁見智喇!
售價:$100(c)



萬年曆用完可以再用
有無諗過買個萬年曆,雖然要由自己換日期及月份有啲麻煩,但勝在可以用完再用,擺幾多年都唔怕Out。家陣有唔少萬年曆樣靚實用,隨時用幾年,完全合乎經濟原則。

Melody迷你中式日曆
講到日曆,又點少得阿爺年代要日日搣嘅掛牆日曆。想懷舊又要靚,推薦呢款Melody日曆,每頁都有不同顏色和公仔,另有大口仔、HelloKitty任你揀。
售價:$36.9(e)



售賣點
(a)ViViShop
旺角潮流特區1樓122號舖
21368178

(b)CherryShop
彌敦道760號聯合廣場M/F15A舖
27872161

(c)city'super
銅鑼灣時代廣場B1地庫
25062888

(d)吉之島
28846888

(e)SanrioVivitix
香港銅鑼灣景隆街3號B舖
21561202

正斗推介:Lego任你砌
另一潮物Lego都出埋萬年曆,全個用Lego組合砌成,任你點砌都得。隨月曆再附送Kubrick公仔一個,玩味十足又夠潮,Lego狂迷必買無疑。
售價:$95(a)

Q版扭蛋皮禮士
迷你版皮禮士糖萬年曆,有三個扭蛋Size的公仔,想轉款可買其他款式的扭蛋公仔自行更換。個個月唔同款都無問題,但換還換,記得換埋日期呀!
售價:$198(a)

大碼骰仔
由一粒粒軟腍腍大碼骰仔組合而成的萬年曆,一套四粒有齊日、月、星期。體積唔算大,放喺枱面夠晒慳位。
售價:$48(c)