名模歐陽妙芝和圈外男友Steven月初在澳洲註冊。Steven在婚後的船河派對上，安排了煙花滙演，一對新人在船上肩並肩欣賞，感覺浪漫又溫馨。
名模歐陽妙芝和圈外男友Steven月初在澳洲悉尼海邊一間教堂共諧連理。妙芝正式成為「方太」，她已開始習慣這個稱呼。Steven為給嬌妻一個難忘的婚禮，在晚上的船河派對中安排另一隻船放煙花，一對新人在船上欣賞煙花滙演，感覺浪漫又溫馨。
妙芝日前註冊後返港，年底會在港大排筵席，朋友近日改口稱呼她為「方太」。妙芝說：「我都開始適應咗大家咁樣叫我，𠵱家結咗婚，我有好實在嘅感覺。Steven真係我自細夢寐以求嘅老公。我細細個嘅擇偶條件係希望另一半係一個外形官仔骨骨、有事業而且體貼、同有幽默感嘅男人。最好重係喺澳洲返嚟，估唔到我真係遇到，我覺得自己好幸福。」
問到Steven安排船河派對放煙花助興，可有給妙芝意外驚喜，她說：「都有㗎，坦白講我一直只係期望將來同鍾意嘅人簽字結婚，但呢次個婚禮真係意想唔到，我好感動同難忘。」
此外，妙芝表示得到這段良緣，除了要多謝好友做媒外，髮型師好友KelvinKoo亦應記一功。她說：「喺我冇拖拍嗰兩年，我去搵Kelvin整頭髮，佢同我講日日同我祈禱，希望我可以搵到個如意郎君。結果我真係如願以償，好多謝佢對我咁有心。」
採訪：BeverlyWong
