應屆十八位候選亞姐、梁思浩同林曉培噚日喺紅磡出席宣傳活動，眾佳麗重負責揭曉決賽當晚嘅司儀同嘉賓。
當晚嘅大會司儀係陳啟泰、梁思浩同林韋辰，表演嘉賓就有林曉培、任賢齊同黃品源，至於吳彥祖就會喺問答環節中考驗一班佳麗。
司儀梁思浩自言今次有近六位數字酬勞，比起佢喺無綫做同類型節目最多計四個騷、以每個騷三千蚊計，即係萬二蚊，𠵱家多咗好多倍。梁思浩一向玩得，唔知佢喺亞姐決賽當晚會唔會「恰」啲佳麗呢？
而亞視喺網上舉行緊個「2004亞洲小姐冠軍人氣榜」投票，其中香港代表1號黃淑玲、韓國代表8號河少英同中國代表15號呂晶晶暫時領先。呂晶晶重話唔知有呢個網上投票，不過就好開心可以見到吳彥祖！
林子祥（阿Lam）噚日起程到昆明為奧比斯探訪當地患有眼疾嘅小朋友，阿Lam更帶備大批文具做見面禮。阿Lam話今次重會參觀手術過程，雖然佢連劏雞都驚，但曾經做過眼部手術嘅佢就相信自己頂得順，最多喺現場半開眼咁話！
吳嘉龍同楊凡噚日宣傳《桃色》，吳嘉龍喺戲入面冇對白，佢話：「好怪好得意。」楊凡聞言話：「佢唔使講嘢，但手摸好多嘢。」吳嘉龍回應：「你教我㗎，要摸番自己。」楊凡即刻話係章小蕙教佢至真。稍後松坂慶子同河利秀都會嚟港宣傳。
官恩娜噚日去將軍澳電視廣播城為無綫新劇《酒店風雲》試造型。
對於獲無綫器重第一次拍劇，官恩娜就話：「好開心，又可以同吳卓羲合作，佢好靚仔，我今次係做一個賣魚妹，之後會變身成為一個fairlady。」
噚日係羅文嘅死忌，佢嘅生前助手歐陽步東前晚去咗蓋鳴暉生日會，阿東話同容祖兒前日一齊去拜羅文，大家講起羅文嘅往事，都忍唔住眼濕濕。至於羅文另一徒弟鄭伊健，阿東話：「我哋夾唔啱時間，但伊健都有去拜佢，佢好有心㗎。」
