桑拿士接手英超球隊紐卡素以嚟，球隊表現唔差，連埋日前作客打和查爾頓，紐記已經保持六場不敗（四勝兩和）。雖然日前紐記對查爾頓場波好好睇，兩隊大踢進攻足球；而兩隊嘅主力紐記前鋒舒利亞同埋查爾頓中場賀蘭特重打到「爆晒缸」，好鬼精采。
不過，我求大俠覺得唯一美中不足，就係紐記嘅年輕前鋒比拿美嘅態度。冇錯，佢雖然係球隊嘅入球功臣，但佢之前已同威爾斯國家隊踢咗兩場世盃外圍賽；而且紐記喺周中又要踢歐洲足協盃，咁桑拿士喺六十六分鐘換走佢，都好應該啫。點知比拿美竟然好唔滿意被換出，一路行出場時一路口中念念有詞（重似乎係三字經嗰隻）。
雖然桑拿士話要睇過賽事錄影先知比拿美乜事，不過佢就好寸咁話：「比拿美之前兩場替威爾斯上陣，兩場都輸波，心理上同生理上都唔適合踢足全場，有sense嘅領隊都會換走佢啦！」
英超球隊保頓嘅西班牙中後場球員甘普喺上星期六對水晶宮時勇戰受傷，初時以為爆頭咁大鑊，點知原來只不過係撞傷咗眼部周圍嘅肌肉；甘普接受矯形手術後，要休息同戴面罩打波幾星期，跟住就會完全康復。咁喺甘普剝面罩後，唔知會唔會靚仔咗，有意外收獲呢？
列斯呢支財困嘅英冠聯球隊，好可能就快會斷窮根。因為佢哋準備將列斯艾蘭路球場附近一幅七畝嘅地，賣畀娛樂發展公司，喺嗰度起賭場、酒店同埋綜合娛樂設施，預計可以賺五百萬鎊（約七千三百萬港元），而喺呢個計劃於○七年完成後，預料更加會帶旺列斯㖭！
前晚華倫西亞主場破身，呢場波最搞笑係西維爾贏波功臣艾蘭達被逐令人哭笑不得。話說佢抽筋離場醫治期間，會方已換走佢，可惜響球場另一邊嘅佢懵然不知，再入場俾球證送張黃牌，兩黃變一紅。我以為呢種溝通錯誤係小朋友踢街場至會出現，估唔到西甲隊都會擺咁大烏龍！
國際米蘭前晚贏烏甸尼斯，今季聯賽主場開齋，大眾焦點當然係梅開二度嘅阿祖安奴。佢踢完世盃外圍賽後，因錯過班機而到周六至歸隊，點估到佢重踢得咁生猛，勇到連教練文仙尼都唔敢換走佢，踢足全場，真鐵人也！不過佢咁搏，即管睇佢禮拜三作客華倫重能否發惡。