型男尊尼狄普（JohnnyDepp）前日帶埋女友VanessaParadis，聯同琦溫絲莉（KateWinslet）到倫敦出席新片《FindingNeverland》首映，當日尊尼戴住眼鏡、着埋大褸打埋呔，睇嚟有啲薯仔兼老成持重。
尊尼喺新片入面演繹童話故事《小飛俠PeterPan》嘅原作者JMBarrie。尊尼前日接受記者訪問，話扮演呢個角色好辛苦，因為要講帶蘇格蘭口音嘅英文。不過好多影評人就話尊尼有機會憑呢個角色問鼎奧斯卡影帝。
尊尼重話JMBarrie呢個人物可以套用喺正受性侵犯兒童官司困擾嘅米高積遜（MichaelJackson）身上㖭，佢話：「Barrie當年成日同好多小朋友一齊，啟發佢創作《小飛俠》，如果換轉𠵱家，佢好可能已經被警方調查。但好多同Barrie接觸過嘅小朋友後嚟接受訪問，都肯定冇受傷害，佢係一個好人，小朋友亦好愛佢。」
至於米高積遜最近就非常頭痕，佢啱啱發表聲明祝福一位以私人理由辭掉工作嘅律師，但聽聞其他幫米高工作嘅律師又出現不和！