個市只係微跌，恒指輕輕唔見24點，但市場氣氛感覺唔多好，C輪溢價與引伸波幅收縮，就算正股冇乜跌，揸C輪都已經唔見錢。短期炒C輪都係要小心啲。
中石油C輪：油價又升，中石油（857）則企定喺4.15元。油價若再升上去，中石油都應該有運行，睇定啲C輪搵一兩隻準備短炒，正路之選係2144，明年1月到期，輪價23.4仙，溢價4.4%，槓桿率17.7倍（有效10.1倍），引伸波幅27%。隻輪昨日跌6%，有啲可能預示正股會回落，隻輪先跌定。講數據，9343唔錯，12月到期，輪價97仙，平水，槓桿率4.3倍（有效3.8倍），因為槓桿率較細，爆炸力與殺傷力都會細好多。
油價有可高處不勝寒，炒中石油C輪，睇住油市，一有依郁，記得快快閃。
中石化C輪：中石化（386）微升1格，C輪9842又係冇跟正股升，反跌3.5%。隻輪年底到期，輪價24.6仙，溢價3.9%，槓桿率12.7倍（有效8.2倍），引伸波幅31.5%。低位博反彈，留意油價變化，唔對路之時要快快跳車。
末日輪9878，本周四最後買賣，行使價3.33元，輪價1仙冇人要，溢價近7%，冇得救。
中海油C輪：中海油（883）跌5仙，收4.15元，熱門C輪4563收50仙，跌4仙。正股若跌到4元邊邊，博反彈，吼4563，明年9月到期，壽命長，唔怕輸溢價。隻輪係新輪，面世冇耐，交投最旺嘅中海油C輪就係佢。
章盛