雖然通訊科技日益發達，不過網絡服務供應商嘅投訴亦無日無之，除咗長期排頭位嘅有線寬頻同香港寬頻外，網上行同和記都唔算好得去邊，本來So-net嘅潮流形象再加大堆數碼產品附加計劃，甚得用家歡心，可吸納更多用戶，筆者都因為個雪白DVD燒碟機而Join去So-net咋。點知一個唔該，將班So-net客過戶晒畀PCCW，話就話一切條款冇變，不過好多人關心遲早要改電郵戶口，認真麻煩。日前PCCW終於出招，向舊有So-net用戶發出電郵通告，以後要喺WebMail度CheckE-Mail（如《IE》），就要登入番網上行個Site，而用POP3Server嘅《Outlook》用家就麻煩得多，要更改幾項設定先可收發電郵，限期係11月11日，用家重要喺死線前將電郵自行備份，否則一切各安天命，絕唔會好似星展咁有十幾萬賠番畀你。
不過平心而論，網上行接晒So-net班客，重點會畀你入番So-net度CheckE-Mail，免費幫So-net宣傳兼增加HitRate吖，所以改WebMail網址都算無可厚非，而且網上行算係有誠意改善服務質素㗎喇，起碼就今次改Domain事件，筆者只撥一通電話，即有專人解答所有疑問，詳細得嚟重好有禮貌㖭，唔再係不停同錄音機對話咁勞氣。希望以後嘅服務都唔跌Walt，等一班舊嘅So-net友條氣順啲啦。
文：寬頻探子
《吹吹IT風》以討論及分析熱門IT話題為主，由電腦、數碼相機、手機、AV產品到TVGames，都屬討論範圍，歡迎讀者提出改善建議、討論話題、疑難雜症，谷氣投訴甚至自薦發表文章都得，總之大家多多交流。
電郵：
《OutlookExpress》修改設定
最主要改動有兩樣，分別係更改收、發E-Mail嘅Server名稱，要注意係網上行並非採用慣常嘅「POP3」同「SMTP」，所以今日就教大家點改：
1.開啟：工具＞帳號＞郵件＞內容＞伺服器
2.內送郵件改為pop.netvigator.com
3.外寄郵件則改為mail.netvigator.com
4.按確定後就大功告成。
網上行客戶服務熱線：28882888