賣地之後，投資市場傳出大手成交，「公路大王」劉根山上市旗艦茂盛控股，以十三億售出銅鑼灣伊利莎伯大廈七層商場，連同百七個車位。買家傳為九龍建業。
若果屬實，就係繼華潤創業十三億三售出中環地盤後，另一最大宗交易。
個商場主要經營食肆，總樓面有二十幾萬呎，收緊六百幾萬月租，屬於核心區罕有大型商場。
舊年開始放盤，近月舖市一浪高於一浪，業主叫價由最初十二億提高到十五億，若以十三億成交，回報大約五厘半。
賣地成績理想，連上車客都走去買樓，搞到啲平價租盤冇乜人吼，租務成交大減。
屯門呢類成交租盤，今個月頭十七日，比上月同期勁減一半。
最多客上車嘅係屯門市廣場及兆麟苑，成交價都係七八十萬，入市原因係供平過租。
祥益董事謝澤銘話，因為放租嘅租盤累積，估計今季租金有機會下跌五巴仙至一成。呢類盤月租四千零蚊。
另外，𠵱家啲盤出租速度慢咗，以前放盤七至十日就租得出，𠵱家至少一個禮拜，長啲甚至成個月。
樓市熾熱，銀行競爭樓按冇放鬆，新產品不斷湧現。Citibank剛推出「按揭智慳息」計劃，除咗每月基本供款，客戶可另增還款額，減低貸款本金。
但若突然手緊，又可攞啲額外供款嚟應急。
呢個計劃一二手樓及轉按都適用，銀行唔收估價、年費或手續費。
樓市熱炒，幾乎個個都覺得，樓價好快重回九七年高峯，總之敢入市就賺。今年入市嘅，三成轉手有賺，但斷估唔到，連九七買入嘅，今年沽出都可以獲利。
中記數據顯示，今年賣出獲利個案有近萬二宗，屬於九七買入嘅，佔二十九單。
獲利幅度最大係馬鞍山雅典居一座五樓C，賺二百八十萬、成三倍幾。鰂魚涌太古城海景花園海棠閣十四樓A，造價比九七高近五成八。
另外，有啲係屬於舊區，例如土瓜灣譚公道六十五號、紅磡信用街單位。
可以賺咁多，認真奇怪，蘭西問中記黃良昇，佢話，呢啲係特別個案，連佢都唔知詳細原因，估計有啲屬當年親友間轉讓。
蘭西
電郵地址：
