資深投資者黎汝遠，近幾個月頻頻見報。以前炒家非常低調，好驚人知佢哋賺咗錢，𠵱家唔同晒。
黎汝遠剛買咗赤柱富豪海灣獨立屋，噚日約齊記者，睇佢同發展商簽約。佢剛以五千二百萬買咗間B50號屋，預計有半成至一成水位執。
富豪酒店范統話，富豪海灣再賣多四間就會加價，前排D型屋重會封盤。又透露，黎汝遠重傾緊另一間B型屋，不過價錢就要高啲。
黎汝遠講完賣富豪海灣賺錢，轉頭聽啲代理講，又有佢嘅買賣消息。中記吳妙粧話，黎汝遠以三百五十萬，賣咗一個牛池灣清水灣道8號高層D，賺四十七萬，跟住以三百七十萬，買番間將軍澳蔚藍灣畔。
美記曾令村話，黎汝遠剛以四百二十萬售出鰂魚涌太古城一單位，執四十三萬。