荷李活自九一年嘅《烈火雄心》後，已經十幾年冇拍過關於消防員嘅電影。最近終於有部由尊特拉華達（JohnTravolta）同祖昆馮力士（JoaquinPhoenix）合演嘅《火海豪情》，係一部向9.11捨身救人嘅消防員致敬嘅電影，將呢個行業嘅真實境況呈現出嚟。美國有影評人更加讚《火》片比《烈》片好睇，係本年度最出色嘅電影之一。
祖昆馮力士喺片中飾演消防員，佢雖然多次喺危險任務上表現出色，但因為工作壓力，令佢開始懷疑自己嘅能力，因為一次救火行動令到佢嘅同袍犧牲，搞到成隊人嘅信心下降。祖昆重喺一次百貨公司大火被困，搞到要由扮演隊長嘅肥尊瞓身同火搏鬥救佢脫離火海。
喺《火海豪情》入面，祖昆同肥尊有高難度嘅救人場面，好似祖昆要由七十層高嘅大廈天台游繩落去五十八樓救人，本身有畏高症嘅佢，需要一段時間先至克服到呢個心理關口。而肥尊都好搏命，大膽咁近距離接觸大火，搞到監製好擔心佢嘅安全，重一度勒令唔畀佢太近啲火嚟拍攝。