孫繼海真係慘，啱啱先喺曼城搶返個正選位，點知喺前晚贏車路士一比○場英超聯整親膝頭，要唞一年先至可以返球場比賽。
老孫喺同車仔前鋒古莊臣一次相撞中，整親左邊膝頭，經診斷後證實佢條十字韌帶同中間韌帶都斷咗，起碼唞一年先好得番。我求大俠聽到呢個消息後，都替老孫傷心，事關佢啱啱先走出谷底，喺曼城攞返個正選，𠵱家要長唞；第日傷癒出返嚟之後個世界都唔同晒，由頭捱過，重有可能俾曼城飛起，你話佢唔傷心就假。
老孫同鄉、效力愛華頓嘅李鐵之前斷腳，重休息咗成九個月，但𠵱家已好番，重有望落場為球會比賽；話晒佢係過來人，希望佢可以幫到手，助老孫度過難關啦！
老孫受傷唔單止對佢自己有影響，亦搞到曼城唔好受。曼城中場線鬧兵荒，雷拿、杜利華冼佳亞同J巴頓都要長唞，𠵱家加多件老孫，唔怪得佢哋領隊基瑾賽後唔係表現得特別開心啦！喺嚟緊嘅比賽，睇嚟要吼曼城對家。
孫繼海跌落谷底，但佢隊友占士就喺谷底爬返上嚟。前晚占士踢到上晒身，左飛右撲，幫曼城爆大冷贏車仔，完場後佢重不知表現得幾興奮，當正捧咗世界盃。係人都知佢𠵱家喺英格蘭國家隊冇咗個正選位，如果英領隊艾歷臣有睇呢場波，應該會加番啲分畀占士。
前晚燕豪芬作客海牙場荷甲聯，當前者領先二比○嘅時候，因為主場球迷不斷用有種類歧視成份嘅歌嚟侮辱球證，於是球證腰斬比賽。馬會話買單場嘅全部退飛，過關就當一倍計；若然你買咗海牙「主勝」，真係執番一身彩，但買咗燕豪芬「客勝」嘅朋友，算你哋唔好彩啦！
被捧成今屆德甲聯降班大熱嘅緬恩斯，愈踢愈有，前晚重贏埋衞冕冠軍不來梅㖭。佢哋除咗趕過拜仁同不來梅升上第三位外，重暫時成為今屆德甲盤王，盤路係七贏一輸。下場佢哋會作客今屆喺主場踢唔出水準嘅史浩克04，如果屆時佢哋可「夫添」，可以考慮追多鋪。
前晚曼聯對伯明翰，費爵爺一度放四個前鋒上陣，真係好似旁述話齋，四二四陣式再現江湖咁。之後開波嘅皇馬，唔知係咪得到啟發，新教頭拉蒙亦曾經放出奧雲、朗拿度及魯爾三大前鋒上陣。雖然佢哋最後都贏唔到波，但呢股倡動進攻足球風氣，對球迷都係好事！