長毛梁國雄進入立法會，連場做騷，沉悶嘅立法會增加大量娛樂性。不過議會應該係比較嚴肅沉悶嘅，立法會議唔係無綫電視綜合騷，如果政治長期娛樂化，香港只會向下沉。
港大搵李歐梵、周星馳對談「漫遊於現代與後現代之間」。《亞洲週刊》大幅報道，講到周星馳嘅無厘頭係：「無厘頭乍聽是瘋言狂言；但其實以黑色幽默的方式，來諷刺和反抗傳統的社會秩序和權力的枷鎖。」《亞週》話周星馳現象橫掃中國大陸大學生，成為他們頂禮膜拜的導師。周星馳咁鬼後現代，然則長毛現象是否也是後現代？哲古華拉對資本主義秩序不滿，與建制搞對抗，長毛既拜服哲古華拉，於是在立法會從宣誓到發問，別具一格，好有可能成為政壇周星馳，以不一般的衣着（T恤）與語言「來諷刺和反抗傳統的社會秩序和權力的枷鎖」。
飲咖啡時碰到議員C，佢話長毛發問好有水平。素來好斯文嘅女選民Y就抗議：「長毛在議事殿堂好冇禮貌，我覺得范徐麗泰做得好啱，喺我心目中加咗分，好心你哋勸吓長毛做番啲正經事，唔好將啲精力去搞騷，博出鏡啦！」女選民Y受大家閨秀教育，行為十分淑女，思維與長毛之類完全不同，好唔明白點解新界東有六萬人投長毛一票。
新界東選民男士K就曾經對左丁山講：「我投長毛一票㗎，選佢唔係搵佢做嘢，我就係想佢向董建華搗蛋，鬧啲高官。我好憤怒㗎，平時唔敢出聲，就係要選長毛呢啲人出嚟講一啲我想講但係唔敢講嘅嘢！」男士K讀過唔少牟宗三嘅書，思想絕對清晰，佢選長毛，都唔知係現代還是後現代現象。年輕學生幾歡迎長毛，因為長毛就係電影版周星馳嘅真實版本。