安仔為姪女覓大屋

安仔為姪女覓大屋

許志安、鄭融和劉浩龍昨日在柴灣出席活動,提到古天樂以六千多萬買了京士柏山的四千餘呎花園獨立屋,問許志安會否趁機換樓改善環境,原來他正有換樓打算。

老竇揸弗
安仔說:「我哥哥生咗個女,第時佢大啲冇自己間房,所以我想搬間大啲嘅屋,大約三千呎。不過我一定要放咗(現居)先可以再買,同埋一定要喺九龍區,之前我喺港島區買咗層樓,但老竇一句唔鍾意,結果蝕咗七十萬,嚟緊一定要帶埋佢去睇樓。」
此外,安仔亦害怕買家上門睇樓,他說:「如果賣唔成重要住咪麻煩,加上唔想公開住所入面啲私人物件,唔係生活相,我啲生活相放喺抽屜入面。」提到安仔曾發表愛的宣言的廚房,他笑說:「咁老土㗎!我對廚房要求唔高,只係用嚟煮麵,你哋放過我啦。」